شىمكەنت اكىمى قالانىڭ جاسىل بەلدەۋىمەن تانىستى

1351
Adyrna.kz Telegram

مەملەكەت باسشىسى قاسىم-جومارت توقاەۆتىڭ بيىلعى جىلى قازاقستان حالقىنا جولداۋىندا «بەس جىل ىشىندە ورمان القابىندا 2 ميلليارد، ەلدى مەكەندەردە 15 ميلليون اعاش وتىرعىزىلاتىن بولادى. بۇل ەلىمىزدەگى كوگالداندىرۋ اۋقىمىن كەڭەيتۋگە سەپتىگىن تيگىزەدى»، - دەپ ايتقان بولاتىن.

وسى باعىتتاعى جۇمىستاردى جۇزەگە اسىرۋ ماقساتىندا شىمكەنت قالاسىنىڭ اكىمى مۇرات ايتەنوۆ سەنبى كۇنى قالالىق تابيعي رەسۋرستار جانە تابيعات پايدالانۋدى رەتتەۋ باسقارماسىنا قاراستى بىرقاتار نىسانداردىڭ قىزمەتىمەن تانىسقان بولاتىن.

ەڭ اۋەلى قالا باسشىسى ا.اسقاروۆ اتىنداعى شىمكەنت مەملەكەتتىك دەندرولوگيالىق ساياباعىنداعى كوشەتتىك تۇقىمباقتىڭ جۇمىسىمەن تانىستى.

جالپى تۇقىمباقتا 8269 ءتۇپ كوشەت وسىرىلۋدە. اتاپ ايتساق، مۇندا 1537 ءتۇپ بوزارشا، 1016 ءجاي ارشا، 891 ءتۇپ ەمەن اعاشى مەن 223 دانا سابىن اعاشى جانە 81 دانا شىنار اعاشى بار. ال، جىلىجايدا 19 ءتۇرلى تۇقىم سەبىلىپ، جاسىل قالامشا تاسىلىمەن 42 ءتۇرلى اعاش-بۇتا دايىندالۋدا.

ارالاۋ بارىسىندا سالا ماماندارى دەندروساياباقتى دامىتۋدىڭ جاڭا كونتسەپتسياسىمەن تانىستىردى. قالا اكىمى الدىمەن اعاشتاردىڭ ءتۇرلى سۇرىپتاعى جيىنتىعىن كوبەيتىپ، دەندروساياباقتى تۋريستەر مەن قالا تۇرعىندارىنىڭ سۇيىكتى جەرىنە اينالدىرۋ قاجەت ەكەنىن ايتتى.

مۇرات ايتەنوۆ اتالعان ساياباقتاعى قۇرىلىس جۇمىستارى جۇرگىزىلىپ جاتقان ۆەلوسيپەد پەن جۇگىرۋ جولدارىنىڭ جۇمىسىن ارالاپ كوردى.

مۇنداعى جۇگىرۋ جولىنىڭ ۇزىندىعى 6457 م، ەنى 3 م. ۆەلوجولعا ارنايى قوزعالىس جولاقتارى جۇرگىزىلگەن. ۇزىندىعى 12,5 كم جولدا جەراستى كابەلدەرى اۋىستىرىلىپ، بيىكتىگى 6 مەترلىك اراقاشىقتىعى 20 مەتردى قۇرايتىن 670 دانا LED باعانالارى قويىلادى. قۇرىلىس جۇمىستارى جىل سوڭىنا دەيىن اياقتالادى دەپ كۇتىلۋدە.

سونىمەن قاتار، شاھار باسشىسى اۋماعى 976 گەكتاردى قۇرايتىن «جاسىل بەلدەۋ» كوممۋنالدىق مەملەكەتتىك مەكەمەسىندە بولدى. مۇندا جالپى سانى 262 مىڭ ءتۇپ اعاش كوشەتتەرى ەگىلگەن.

اكىم جاسىل ايماقتى دامىتۋ ءۇشىن ەڭ الدىمەن شىمكەنت قالاسىنداعى اعاشتارعا تۇگەندەۋ جۇمىستارىن جۇرگىزىپ، وسىنىڭ ناتيجەسىندە جاسىل بەلدەۋدى ۇلعايتۋ مەن كوگالداندىرۋ ماسەلەسىن قاراستىرۋدى تاپسىردى.

شىمكەنت قالاسى اكىمىنىڭ ءباسپاسوز قىزمەتى

پىكىرلەر