قازان ايىنىڭ ەكىنشى جەكسەنبىسى قازاقستاندا مۇگەدەكتەر كۇنى بولىپ بەكىتىلگەن. حالىقارالىق مۇگەدەكتەر كۇنىن اتاپ ءوتۋ مۇمكىندىگى شەكتەۋلى جانداردىڭ پروبلەمالارىنا، ار-نامىسى مەن قۇقىقتارىن قورعاۋ ماسەلەسىنە قوعام نازارىن اۋدارۋعا، سونداي-اق، مۇگەدەكتەردىڭ ەلىمىزدىڭ قوعامدىق-ساياسي، الەۋمەتتىك-مادەني ومىرىنە بەلسەندى ارالاسۋىن قامتاماسىز ەتۋگە باعىتتالعان.
وسىعان وراي، شىمكەنت قالاسىنىڭ اكىمى مۇرات ايتەنوۆ «شاپاعات» وڭالتۋ ورتالىعىندا بولىپ، مەكەمەنىڭ جۇمىسىمەن تانىستى.
«شاپاعات» مۇگەدەكتەرگە ارنالعان وڭالتۋ ورتالىعى» كوممۋنالدىق مەملەكەتتىك مەكەمەسى پسيحو-نەۆرولوگيالىق اۋرۋلارى بار ون سەگىز جاستان اسقان مۇگەدەكتەرگە، ءبىرىنشى جانە ەكىنشى توپتاعى مۇگەدەكتەرگە ارناۋلى الەۋمەتتىك قىزمەتتەر كورسەتەدى. وتكەن جىلى اشىلعان ورتالىق 70 ورىنعا لايىقتالعان. وندا كەلۋشىلەرگە بارلىق جاعداي جاسالعان. ينسترۋكتور مامانداردىڭ كومەگىمەن دەنە شىنىقتىرۋ كابينەتىنىڭ قىزمەتىن پايدالانا الادى. ارنايى كابينەتتەردە مۇگەدەكتەر دارىگەر نۇسقاۋى بويىنشا ءتۇرلى ەم-دوم قابىلدايدى.
مۇرات دۇيسەنبەكۇلى مەملەكەت مۇمكىندىگى شەكتەۋلى ازاماتتارعا ءاردايىم قامقورلىق كورسەتەتىنىن، الەۋمەتتىك تولەمدەردىڭ مولشەرى تۇراقتى تۇردە ءوسىپ كەلە جاتقانىن ايتتى.
جالپى، شىمكەنت قالاسىندا مۇمكىندىگى شەكتەۋلى 37 مىڭعا جۋىق ادام ەسەپكە الىنعان.
وسى ساناتتاعى ادامداردىڭ الەۋمەتتىك جاعدايىن جاقسارتۋ ماقساتىندا بيىل بيۋدجەت كوزدەرىنەن بولىنگەن قارجىعا ارنايى قۇرالداردىڭ 55 ءتۇرى ساتىپ الىنىپ، ارنايى قىزمەتتەردىڭ 4 ءتۇرى كورسەتىلۋدە.
بيىل قر ەڭبەك جانە حالىقتى الەۋمەتتىك قورعاۋ مينيسترلىگىنەن شىمكەنت قالاسىنا 406 دانا ەلەكتروندى قولاربا بولىنگەن. جىل باسىنان بەرى 100 دانا ەلەكتروندى قولاربا كەلىپ، I, II-توپتاعى مۇگەدەكتەرگە ۇلەستىرىلۋدە. قالعان 306 داناسى جىل سوڭىنا دەيىن مۇقتاج جاندارعا تاراتىلادى. بيۋدجەتتەن قوسىمشا 1 210 سەرۋەندىك جانە بولمەلىك قول اربا الۋعا كەلىسىمشارت تۇزىلگەن.
سونىمەن قاتار شىمكەنتتەگى التى ارناۋلى الەۋمەتتىك مەكەمە مۇگەدەكتىگى بار 1 725 ادامعا قىزمەت كورسەتكەن.
اتاپ ايتقاندا، پسيحونەۆرولوگيالىق اۋىتقۋى بار، تىرەك-قيمىل اپپاراتىنىڭ فۋنكتسيالارى بۇزىلعان بالالار مەن پسيحونەۆرولوگيالىق اۋرۋى بار 18 جاستان اسقان ازاماتتار، ءى جانە ءىى-توپتاعى مۇگەدەكتەر مەن قارتتارعا ستاتسيونارلىق، جارتىلاي ستاتسيونارلىق رەجيمدە جانە ۇيدە وڭالتۋ شارالارى جۇرگىزىلگەن.
مۇنان بولەك مەملەكەتتىك مەكەمەلەرگە التەرناتيۆا رەتىندە ۇكىمەتتىك ەمەس ۇيىمدار دا وسى ساناتتاعى ازاماتتارعا الەۋمەتتىك قىزمەت كورسەتۋدە.
شىمكەنت قالاسى اكىمىنىڭ ءباسپاسوز قىزمەتى
