بۇگىن شىمكەنت قالاسىنداعى مارتوبە تاريحي كەشەنىندە كەلەشەك ۇرپاققا جولداۋ جازىلعان كاپسۋلا قالاندى. شاراعا قالا اكىمى م.ايتەنوۆ، شىمكەنت قالالىق سوتىنىڭ توراعاسى ە.راحيمبەكوۆ، شىمكەنت قالالىق ءماسليحاتىنىڭ حاتشىسى ع.تاشقاراەۆ قاتىستى.
جيىندا ءسوز العان قالا باسشىسى بۇگىنگى ءىس-شارانىڭ ماڭىزدىلىعىنا توقتالىپ، مارتوبە - ەل تاريحىندا ايرىقشا مانگە يە تاريحي ورىن ەكەنىن ايتتى.
«مارتوبە - ەلدىگىمىزدىڭ مارتەبەسىن، بىرلىگىمىزدىڭ بەرەكەسىن ايشىقتاعان جەر. بۇل اۋماقتا ايگىلى دالا پارلامەنتىنىڭ كەلەلى جيىندارى ءوتىپ، «جەتى جارعىعا» سۇيەنە وتىرىپ تاريحتا ءىزى قالعان ماڭىزدى شەشىمدەر قابىلدانعان. قازاق تاريحى قاشاندا بىرىگۋ تاريحى بولعانىن بىلەمىز. ىشكى بىرلىگىمىزدى بەكەمدەگەن، ەلدىگىمىزدىڭ ەڭسەسىن كوتەرگەن مۇنداي قاسيەتتى ورىندار ەل جادىندا ماڭگى ساقتالماق»،-دەدى م.ايتەنوۆ.
سوت قىزمەتكەرلەرىنىڭ كەلەشەك ۇرپاققا قالدىرعان جولداۋىندا 14-15 عاسىرلاردان باستاۋ العان قازاق ەلىنىڭ زاڭناما تاريحى مەن ەگەمەندى ەلىمىزدىڭ بۇگىنگى زاڭ ۇستەمدىگى باياندالعان.
انىقتاما: مارتوبە كەشەنى شىمكەنت قالاسىنىڭ قاراتاۋ اۋدانىنا قاراستى سايرام تۇرعىن الابىنان قارامۇرت اۋىلىنا قاراي شىعا بەرىس جولدىڭ سول جاق بەتىندە ورنالاسقان. بۇل توبە ءۇىى-ءحىى عاسىرلارداعى قالاشىقتىڭ ورنى. 20*30م ولشەمدى تسيتادەل. بيىكتىگى 6-7م، توبەسى - تەگىس.
مۇندا ءحۇىى عاسىردا بيلىك باسىنا كەلگەن ەسىم حاننان باستاپ، ءحۇىىى عاسىرداعى تاۋكە حان تۇسىنا دەيىن التى الاشتىڭ بالاسى باس قوسىپ، بيلەر كەڭەس قۇرعان. «ەسىم حاننىڭ ەسكى جولى» جانە «جەتى جارعى» دا وسى ماڭدا تالقىعا ءتۇسىپ، جاريالانعان. «جەتى جارعىنى» قابىلدار ساتتە قازاقتىڭ اتاقتى بي-شەشەندەرىنەن 12 بي، ولاردىڭ قاتارىندا تولە، قاز داۋىستى قازىبەك، ايتەكە بيلەردەن وزگە جايما، ساسىق، كوكىم بيلەر دا قاتىسقان. مارتوبەنىڭ ۇلى دالا پارلامەنتى اتالۋى وسىدان.
شىمكەنت قالاسى اكىمىنىڭ ءباسپاسوز قىزمەتى
