بۇگىن شىمكەنت قالاسىنىڭ اكىمى مۇرات ايتەنوۆ «ۇزدىك پەداگوگ-2020» بايقاۋىنىڭ قاتىسۋشىلارىن قابىلدادى. كەزدەسۋدە پەداگوگتار قاۋىمىن كاسىبي مەرەكەلەرىمەن قۇتتىقتاپ، قالانىڭ مەرەيىن كوتەرگەن ۇستازدارعا شىنايى العىسىن جەتكىزىپ، ريزاشىلىعىن ءبىلدىردى.
ۇستازىن ۇلىقتاي بىلگەن ەلدىڭ كەلەشەگى دە جارقىن بولاتىنىن ايتقان قالا باسشىسى رەسپۋبليكالىق «ۇزدىك پەداگوگ-2020» بايقاۋىنا قاتىسقان 12 ۇستازعا العىس حات پەن 400 مىڭ تەڭگەنىڭ سەرتيفيكاتىن تابىستادى.
سونىمەن قاتار، رەسپۋبليكالىق جارىستا ۇزدىك دەپ تانىلعان ءۇش ۇستازعا قر ءبىلىم جانە عىلىم مينيسترلىگىنىڭ «ۇزدىك پەداگوگ» مەدالى مەن 1000 اەك قارجى كولەمىندە سىياقىسى بەرىلدى. ولار، №9 IT ليتسەي مەكتەبىنىڭ ورىس ءتىلى ءپانىنىڭ مۇعالىمى - گۇلزيرا انارتاەۆا، № 8 مامانداندىرىلعان گيمنازيا مەكتەبىنىڭ باستاۋىش سىنىپ مۇعالىمى - گۇلدانا داۋلەنباەۆا جانە جوعارى مەديتسينالىق كوللەدجىنىڭ حيميا ءپانىنىڭ مۇعالىمى - جادىرا شابدەن.
قالاداعى 26 مىڭ پەداگوگ اراسىنان 12 ۇستاز ۇزدىك دەپ تانىلىپ، رەسپۋبليكالىق جارىسقا جولداما العان بولاتىن.
ماراپاتتاۋ ءراسىمىن قورىتىندىلاعان شاھار باسشىسى بارشا مۇعالىمگە جاس ۇرپاقتى تاربيەلەۋدەگى ورەلى ىستەرى مەن مەملەكەتتىڭ گۇلدەنۋى جولىنداعى ابىرويلى جۇمىستارىنا تابىس تىلەدى.
شىمكەنت قالاسى اكىمىنىڭ ءباسپاسوز قىزمەتى
