قازىر جوعارى وقۋ ورنىن تامامداعان جاستار ءۇشىن ماماندىق بويىنشا جۇمىسقا تۇرۋ قيىن. سەبەبى ۋنيۆەرسيتەت ولارعا 4 جىلدان كەيىن قاجەتىنە اساتىن داعدىلاردى ۇيرەتپەي، تەوريامەن شەكتەلەدى. جوعارى ءبىلىم سالاسىنىڭ نەگىزگى كليەنتى — جۇمىس بەرۋشى بولعاندىقتان ولاردىڭ تالابى دا ەسكەرىلمەي كەلەدى. قازىرگى تاڭدا، جۇمىس بەرۋشىلەردى دە ءبىلىم باعدارلامالارىنىڭ وزەكتىلىگى مەن ساپاسى الاڭداتىپ وتىر. اتامەكەن ۇقپ-نىڭ سوڭعى مالىمەتىنە سۇيەنسەك، جالپى العاندا جۇمىس بەرۋشىلەردىڭ 68 پايىزى قازىرگى وقۋ باعدارلاماسىنا كوڭىلدەرى تولمايدى. قازاقستاندا 60-تان استام جوو-دا وقىعان تۇلەكتەردىڭ جارتىسى جۇمىسسىزدار قاتارىندا.
وسى ورايدا، « جۇمىس بەرۋشىلەردىڭ ۋنيۆەرسيتەت تۇلەكتەرىنە كوڭىلى تولا ما؟» دەگەن تاقىرىپ قر ءبىلىم جانە عىلىم مينيسترلىگىنە قاراستى ADAL BILIM جوبالىق ءوفيسىنىڭ الاڭىنداعى تالقىلاندى. تىكەلەي ەفير بارىسىندا م.س. نارىكباەۆ اتىنداعى كازگيۋ ۋنيۆەرسيتەتى باسقارما توراعاسىنىڭ ورىنباسارى ەربولات مۇحامەدجان حالىقتى تولعاندىرىپ جۇرگەن وزەكتى سۇراقتار قويدى.
«اتامەكەن» ۇكپ باسقارما توراعاسىنىڭ ورىنباسارى ولجاس ورداباەۆقا «تۇلەكتەرى جۇمىسسىز جۇرگەن جوو-دارىن جابۋ قاجەت پە؟ پاندەميانى ەسكەرە كەلە، 2021 جىلى قازاقستاندا جۇمىسسىزدىق دەڭگەيى قالاي وزگەردى؟ جاستاردىڭ جۇمىسقا ورنالاسۋ ماسەلەسىن شەشۋ جولدارى قانداي؟» دەگەن ساۋالدار قويىلدى. ولجاس مىرزانىڭ تىكەلەي ەفيردە ايتقان ستاتيستيكالىق اقپاراتى ويلاندىرىپ تاستادى. ماماندىقتاردىڭ 90%-ىنىڭ رەيتينگىن انىقتالعانىن ايتىپ، ۋنيۆەرسيتەت تۇلەكتەرىنىڭ جۇمىسقا ورنالاسۋ كورسەتكىشى تومەندەپ كەتكەنىن جەتكىزدى. الايدا بۇل پاندەمياعا بايلانىستى بولۋى دا مۇمكىن دەيدى.
«ءبىلىم باعدارلامالارىنىڭ 32 %-ى عانا جۇمىس بەرۋشىلەردىڭ كوڭىلىنەن شىعادى، 15,6% - ى ىسكە جارامسىز، قالعان 52%-ى كۇردەلى وزگەرتۋدى قاجەت ەتەدى. 29 ۋنيۆەرسيتەتتىڭ ءبىلىم باعدارلاماسىنىڭ 80 %-ى وزەكتى ەمەس. ءبىر قىزىعى، ءدال وسى جوو تۇلەكتەرىنىڭ جۇمىسقا ورنالاسۋ دەڭگەيى دە تومەن. ء"موبيلدى جۇمىسپەن قامتۋ ورتالىقتارى" جوباسى اياسىندا نۇر-سۇلتان، الماتى جانە شىمكەنت قالالارىندا 220 مىڭعا جۋىق ازاماتقا قىزمەت كورسەتتىك. ولاردىڭ اراسىندا جوعارى جانە ورتا ءبىلىمى بار 25-46 جاستاعى ەڭبەككە قابىلەتتى ادامدار بار. بىراق ديپلومدارى جۇمىس تابۋعا كومەكتەسپەي وتىر. ويتكەنى 45% -ىندا قوعاممەن قارىم-قاتىناس ورناتۋ، كوماندامەن جۇمىس ىستەۋ، ءوز ويىن اشىق جەتكىزۋ، سىني ويلاۋ قابىلەتى سياقتى ەڭبەك داعدىلارى جوق. جۇمىس بەرۋشىلەردىڭ ايتۋىنشا، ولارعا وقۋ بارىسىندا اقپاراتپەن جۇمىس ىستەۋدى ۇيرەتپەگەن، رەسمي حات جازىپ، قۇجاتتى دۇرىس تولتىرا دا المايدى»،- دەيدى ولجاس ورداباەۆ.
"ادىرنا" ۇلتتىق پورتالى.
فوتو اشىق دەرەككوزدەن الىندى.
