Qazir joǵary oqý ornyn támamdaǵan jastar úshin mamandyq boıynsha jumysqa turý qıyn. Sebebi ýnıversıtet olarǵa 4 jyldan keıin qajetine asatyn daǵdylardy úıretpeı, teorııamen shekteledi. Joǵary bilim salasynyń negizgi klıenti — jumys berýshi bolǵandyqtan olardyń talaby da eskerilmeı keledi. Qazirgi tańda, jumys berýshilerdi de bilim baǵdarlamalarynyń ózektiligi men sapasy alańdatyp otyr. Atameken UQP-nyń sońǵy málimetine súıensek, jalpy alǵanda jumys berýshilerdiń 68 paıyzy qazirgi oqý baǵdarlamasyna kóńilderi tolmaıdy. Qazaqstanda 60-tan astam JOO-da oqyǵan túlekterdiń jartysy jumyssyzdar qatarynda.
Osy oraıda, « Jumys berýshilerdiń ýnıversıtet túlekterine kóńili tola ma?» degen taqyryp QR Bilim jáne ǵylym mınıstrligine qarasty ADAL BILIM jobalyq ofısiniń alańyndaǵy talqylandy. Tikeleı efır barysynda M.S. Nárikbaev atyndaǵy KAZGIýÝ Ýnıversıteti Basqarma Tóraǵasynyń orynbasary Erbolat Muhamedjan halyqty tolǵandyryp júrgen ózekti suraqtar qoıdy.
«Atameken» UKP Basqarma tóraǵasynyń orynbasary Oljas Ordabaevqa «Túlekteri jumyssyz júrgen JOO-daryn jabý qajet pe? Pandemııany eskere kele, 2021 jyly Qazaqstanda jumyssyzdyq deńgeıi qalaı ózgerdi? Jastardyń jumysqa ornalasý máselesin sheshý joldary qandaı?» degen saýaldar qoıyldy. Oljas myrzanyń tikeleı efırde aıtqan statıstıkalyq aqparaty oılandyryp tastady. Mamandyqtardyń 90%-ynyń reıtıngin anyqtalǵanyn aıtyp, ýnıversıtet túlekteriniń jumysqa ornalasý kórsetkishi tómendep ketkenin jetkizdi. Alaıda bul pandemııaǵa baılanysty bolýy da múmkin deıdi.
«Bilim baǵdarlamalarynyń 32 %-y ǵana jumys berýshilerdiń kóńilinen shyǵady, 15,6% - y iske jaramsyz, qalǵan 52%-y kúrdeli ózgertýdi qajet etedi. 29 ýnıversıtettiń bilim baǵdarlamasynyń 80 %-y ózekti emes. Bir qyzyǵy, dál osy JOO túlekteriniń jumysqa ornalasý deńgeıi de tómen. "Mobıldi jumyspen qamtý ortalyqtary" jobasy aıasynda Nur-Sultan, Almaty jáne Shymkent qalalarynda 220 myńǵa jýyq azamatqa qyzmet kórsettik. Olardyń arasynda joǵary jáne orta bilimi bar 25-46 jastaǵy eńbekke qabiletti adamdar bar. Biraq dıplomdary jumys tabýǵa kómektespeı otyr. Óıtkeni 45% -ynda qoǵammen qarym-qatynas ornatý, komandamen jumys isteý, óz oıyn ashyq jetkizý, synı oılaý qabileti sııaqty eńbek daǵdylary joq. Jumys berýshilerdiń aıtýynsha, olarǵa oqý barysynda aqparatpen jumys isteýdi úıretpegen, resmı hat jazyp, qujatty durys toltyra da almaıdy»,- deıdi Oljas Ordabaev.
"Adyrna" ulttyq portaly.
Foto ashyq derekkózden alyndy.
