شىمكەنت قالاسىندا كۇزگى جاۋىن-شاشىن كەزىندە يرريگاتسيالىق ارىقتاردىڭ تولىپ قالۋىنىڭ الدىن الۋ ماقساتىندا بىرقاتار جۇمىستار اتقارىلۋدا. قالا اكىمىنىڭ تاپسىرماسىنا سايكەس بۇگىندە كوشەلەردەگى يرريگاتسيالىق ارىقتار تولىقتاي قوقىستان تازارتىلىپ جاتىر.
شىمكەنت قالاسىنىڭ ەنەرگەتيكا جانە كوممۋنالدىق شارۋاشىلىق باسقارماسىنىڭ تەڭگەرىمىندەگى ۇزىندىعى 97,7 كم كەلەتىن 9 وزەن-كانال (قوشقار اتا، قاراسۋ وزەندەرى مەن اقساي قاراباستاۋ، شىمكەنت، جاڭا-شەك، كومپاس، توعىس، ساسىق، ىنتىماق كانالدارى) مەن ورتالىق كوشە بويلارىنداعى 585 كم يرريگاتسيالىق جۇيەلەردى سانيتارلىق تازالاۋ جۇمىستارى جۇرگىزىلۋدە.
بۇدان بولەك، سۋ الۋ قاۋپى بار 38 مەكەنجايعا 15,5 شاقىرىم يرريگاتسيالىق جۇيە سالىنىپ جاتىر. اتالعان جۇمىستار بارىسىندا بايدىبەك بي كوشەسى التىن ساراي تويحاناسىنىڭ الدى، تولەمەتوۆ كوشەسىندەگى ايبول ايالداماسى، باباشۇلى كوشەسى №115 مەكتەپتىڭ الدى، كوشەروۆ كوشەسى، دوروگو №1 تەمىر جول كوپىرى، جىبەك جولى كوشەسىندەگى تەسىك كوپىر وتكەلى سىندى بىرقاتار وزەكتى نۇكتەلەردەگى ماسەلەلەر شەشىمىن تاپپاق.
سونىمەن قاتار، سۋ باسۋدىڭ الدىن الۋ ماقساتىندا يرريگاتسيا جۇيەلەردىڭ نەگىزگى ارتەرياسى سانالاتىن جاڭا شەك كانالى ارناسىن كازباكالەيتورگتان ايماۋىتوۆ كوشەسىنە دەيىن 4,4 شاقىرىم ارىققا كۇردەلى جوندەۋ جۇمىستارى جۇرگىزىلۋدە. جوندەۋ جۇمىستارى وسى جىلدىڭ قاراشا ايىندا اياقتالادى دەپ جوسپارلانۋدا.
شىمكەنت قالاسى اكىمىنىڭ ءباسپاسوز قىزمەتى
