شىمكەنتتە العاش رەت كارديوحيرۋرگتار جابىق تۇردە جۇرەگىندە احاۋى بار ناۋقاستىڭ قاقپاقشاسىن حيرۋرگيالىق جولمەن اۋىستىرىپ بەردى. پىشاقسىز جاسالاتىن وتاعا جەرگىلىكتى اق حالاتتىلارعا نۇر-سۇلتان قالاسى ۇلتتىق عىلىمي كارديوحيرۋرگيالىق ورتالىعىنان بىلىكتى ماماندار كومەككە كەلدى.
ۇلتتىق عىلىمي كارديوحيرۋرگيالىق ورتالىعىنىڭ ينتەرۆەنتسيوندى كارديولوگيا جانە راديولوگيا ءبولىمىنىڭ مەڭگەرۋشىسى اليمباەۆ سەرىك جانە كاتەتەرلەۋ زەرتحاناسىنىڭ مەڭگەرۋشىسى مۋساەۆ ءابدۋراشيتتىڭ قاتىسۋىمەن 82 جاستاعى قارت كىسىنىڭ جۇرەگىنە جابىق تۇردە وپەراتسيا جاسالدى. وتا كەزىندە ماماندار ناۋقاستىڭ اياق كۇرە تامىرىنا جەتكىزۋشى قۇرىلعى ارقىلى ەنىپ، جۇرەك قاقپاشاسىن حيرۋرگيالىق جولمەن الماستىرىپ بەردى.
«وتا ءتۇرى - اورتا قاقپاقشاسىن ترانسكاتەتەرلى يمپلانتاتسيالاۋ دەپ اتالادى. وپەراتسيا جۇمىس ىستەيتىن جۇرەككە جاسالدى. ياعني، وكپەنى جاساندى جەلدەتۋسىز ىستەلدى. سوندىقتان ءبىز وتانىڭ نەگىزگى بولىگى - قاقپاقشانى الماستىرۋ ۋاقىتىن 20 سەكۋندتا جاساپ بىتىردىك. شىمكەنتتىك دارىگەرلەردىڭ مۇمكىندىگى زور. كارديو ورتالىقتا ناۋقاستار مەن ماماندارعا قاجەتتى جاعداي جاسالعان» - دەيدى ۇلتتىق عىلىمي كارديوحيرۋرگيالىق ورتالىعىنىڭ ينتەرۆەنتسيوندى كارديولوگيا جانە راديولوگيا ءبولىمىنىڭ مەڭگەرۋشىسى سەرىك اليمباەۆ .
وپەراتسيا جاسالعان 82 جاستاعى ناۋقاسقا «اورتا قاقپاقشاسىنىڭ ستەنوزى» دياگنوزى قويىلعان. ادەتتە كارديولوگتار ەگدە جاستاعىلارعا جۇرەگىنە وتا جاساۋعا كەڭەس بەرمەيدى. دەگەنمەن بۇل جولى بىلىكتى ماماندار تاۋەكەلگە بارىپ، قارت كىسىنىڭ جۇرەك قاقپاقشاسىن الماستىرىپ بەردى. دارىگەرلەر وتا ءساتتى جانە تىلىكسىز وتكەندىكتەن، ناۋقاس ەكى-ءۇش كۇن ارالىعىندا وڭالادى دەيدى.
بۇل تاجىريبە الماسۋ وتاسى ناتيجەسىندە جەرگىلىكتى مەديتسينا ماماندارى جۇرەك قاقپاقشاسىنا جابىق تۇردە وتا جاساۋدى ءوز بەتىنشە اتقارا الاتىنىن ايتادى.
ايتا كەتەيىك، مۇنداي وپەراتسيانىڭ ءتۇرى مەديتسينالىق كومەكتىڭ كەپىلدەندىرىلگەن كولەمى شەڭبەرىندە ەلدىڭ ءاربىر ازاماتىنا اقىسىز تۇردە كورسەتىلەدى.
شىمكەنت قالاسى اكىمىنىڭ ءباسپاسوز قىزمەتى
