ۇلىلاردى ۇلىقتاۋ ما، الدە مازاقتاۋ ما؟

6837

كۇنى كەشە الەۋمەتتىك جەلىدە الماتى وبلىسى، بالقاش اۋدانى، باقاناس اۋىلىندا دىنمۇحامەد قوناەۆقا ارناپ قويىلعان ەسكەرتكىشتىڭ سۋرەتى قوعام نارازىلىعىن تۋدىردى.

جەلى قولدانۋشىلارى بۇل تۋىندىعا قاتىستى «ءمۇسىن جاساۋدا بايقاۋ جاريالاۋعا بولماس پا ەدى؟ مەكتەپ وقۋشىسىنىڭ پلاستيليننەن جاساي سالعان شاتپاعىنا ۇقسايدى»، «پروپورتسيالارى ساقتالماعان»، «مىنانى قويۋعا كىم رۇقسات بەرگەن؟» دەگەن پىكىرلەردى جارىسا جازۋدا.

بەلگىلى ءمۇسىنشى ولجاس مۇحامەدي Facebook جەلىسىندەگى رەسمي پاراقشاسىندا تۋىندىنى تەندەر مەن پارا ەسكەرتكىشىنە تەڭەدى.

«قازاقستانداعى ەسكەرتكىشتەر مەن مۇسىندەر ماسەلەسىن كوپتەن بەرى كوتەرىپ كەلەمىن. الايدا بۇگىنگى جاعداي بارلىعىنا ۇنايتىن سەكىلدى.
مۇمكىن پرەزيدەنت بۇل جاعدايعا نازار اۋدارار. مەن 60 ادامنان تۇراتىن مۇسىنشىلەر توبىنىڭ اتىنان ءوز ۇسىنىسىمدى بەرۋگە قۋاناتىن ەدىم»،-دەدى ول.

الماتى وبلىسى اكىمدىگىنىڭ مالىمەتى بويىنشا، تاريحي تۇلعانىڭ ءمۇسىنى جەكە قولداۋشىلاردىڭ قارجىسىمەن ورناتىلعان.

ايتا كەتەيىك، بۇل قوعام تالقىسىنا تۇسكەن العاشقى تاريحي-مادەني مۇرا ەمەس.

بۇعان دەيىن وسكەمەندەگى اباي مەن ميحاەليستى مازاق ەتكەن ەسكەرتكىش حالىقتىڭ دۇرلىگۋى ناتيجەسىندە الدىرتىلعان بولاتىن. ءمۇسىنشى اباي اتامىزدىڭ تۇلعاسىن ەرگەجەيلى ەتىپ بەينەلەپ، ورىس زەرتتەۋشىسى ميحاەليسپەن «سەلفي» جاساپ تۇرعانداي كورسەتكەن.

اباي جانە ميحاەليس

2019 جىلى سەمەي قالاسىنداعى جەڭىس ساياباعىندا ورناتىلعان مانشۇك مامەتوۆانىڭ اعاشتان جاسالعان ءمۇسىنى ءبىراز ادامدى شوشىتتى. كەيبىرەۋلەر تۋىندىنى مىستان كەمپىرگە ۇقساتىپ، باتىر قىزدى قورلاۋدى توقتاتۋدى تالاپ ەتكەن ەدى.

مانشۇك مامەتوۆا

سونداي-اق، قىزىلوردا كوشەلەرىنىڭ بىرىنە قويىلعان قازاق قىزىنىڭ ەسكەرتكىشى، جەزقازعانداعى اباي ءمۇسىنى دە كوپشىلىكتىڭ كوڭىلىنەن شىقپادى.

وكىنىشكە قاراي، ەلىمىزدەگى ەسكەرتكىشتەر توڭىرەگىندە داۋ كوپ. بۇگىندە ۇلىلاردى ۇلىقتاۋدىڭ ورنىنا، ولاردىڭ بەينەلەرىن مازاق ەتۋدى ادەتكە اينالدىرعاندايمىز. بىزدىڭ تاراپتان ايتارىمىز — حالقىمىزدىڭ وتكەنى مەن بۇگىنىن بايلانىستىراتىن مادەني ەسكەرتكىشتەردىڭ ۇلتتىق يدەولوگيا قالىپتاستىرۋ جولىنداعى نەگىزگى قۇرال ەكەنىن ۇمىتپاساق ەكەن دەگەن تىلەك قانا...

ديانا اسان،

«ادىرنا» ۇلتتىق پورتالى

پىكىرلەر
رەداكتسيا تاڭداۋى