اقش پرەزيدەنتى دونالد ترامپ اق ءۇي اۋماعىنا تەڭىز زەرتتەۋشىسى حريستوفور كولۋمبتىڭ ءمۇسىنىن ورناتتى، دەپ حابارلايدى “ادىرنا”.
بۇل ءمۇسىن 1984 جىلى رونالد رەيگان بالتيموردا سالتاناتتى تۇردە اشقان ەسكەرتكىشتىڭ قايتا جاسالعان نۇسقاسى. اتالعان ەسكەرتكىش 2020 جىلى نارازىلىقتار كەزىندە قۇلاتىلعان ەدى.
The Washington Post باسىلىمىنىڭ حابارلاۋىنشا، ءمۇسىننىڭ تۇعىرىنداعى تاقتايشادا: «2020 جىلعى 4 شىلدەدە جويىلدى. 2022 جىلى قايتا جاڭعىرتىلدى» دەپ جازىلعان.
2020 جىلدىڭ جازىندا افروامەريكالىق دجوردج فلويدتىڭ قازاسىنان كەيىن اقش-تا جاپپاي نارازىلىقتار ءوتتى. Black Lives Matter قوزعالىسىنىڭ جاقتاستارى تاريحي تۇلعالاردىڭ ەسكەرتكىشتەرىن قورلادى. ولاردىڭ پىكىرىنشە، بۇل تۇلعالار ناسىلدىك ازشىلىقتاردى قىسىمعا العان.
بەلسەندىلەر حريستوفور كولۋمب ەسكەرتكىشتەرىنە دە قارسى شىقتى. سەبەبى ونىڭ ەكسپەديتسيالارى جاڭا دۇنيەنىڭ ەۋروپالىق وتارلانۋىنا جول اشقان دەپ ەسەپتەلەدى.
The Washington Post اتاپ وتكەندەي، سوڭعى جىلدارى كەيبىر عالىمدار مەن بەلسەندىلەر امەريكالىقتاردى كولۋمبتى دارىپتەۋدەن باس تارتۋعا شاقىرىپ كەلەدى. اقش-تىڭ كەيبىر شتاتتارى كولۋمب كۇنىنىڭ ورنىنا تۇپكى حالىقتار كۇنىن اتاپ وتەدى. 2021 جىلى بۇرىنعى پرەزيدەنت دجو بايدەن بۇل مەرەكەنى العاش رەت رەسمي تۇردە اتاپ وتكەن.
ال دونالد ترامپ حريستوفور كولۋمب پەن وزگە دە تاريحي تۇلعالاردىڭ ەسكەرتكىشتەرىن بۇزۋ ارەكەتتەرىن بىرنەشە رەت سىنعا العان. 2024 جىلى ول كولۋمبتى «ناعىز امەريكالىق قاھارمان» دەپ اتاعان دەكلاراتسياعا قول قويعان.
