شىمكەنت قالاسىنىڭ اكىمى جاڭا وقۋ جىلىنا دايىندىق جۇمىستارىنىڭ بارىسىمەن تانىستى

1324
Adyrna.kz Telegram

مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىنا سايكەس شىمكەنت قالاسىنداعى مەكتەپتەردە جاڭا وقۋ جىلىنا دايىندىق جۇمىستارى قارقىندى جۇرگىزىلىپ جاتىر. وسىعان سايكەس، شىمكەنت قالاسىنىڭ اكىمى مۇرات ايتەنوۆ №24 س.ەرۋباەۆ اتىنداعى مەكتەپ-ليتسەيىنە بارىپ، 2020-2021 وقۋ جىلىنا دايىندىق جۇمىستارىنىڭ بارىسىن پىسىقتادى. وقۋ سىنىپتارىن ارالاپ، باق وكىلدەرىمەن بريفينگ وتكىزدى.

قالادا جاڭا وقۋ جىلى 742 ءبىلىم بەرۋ مەكەمەلەرىمەن 320 مىڭعا جۋىق ءبىلىم الۋشىلارمەن باستالعالى وتىر.
قالا اكىمىنىڭ ايتۋىنشا، بيىل 13 مەكتەپ (6 جاڭا، 7 قوسىمشا) جانە 2 ونەر مەكتەبىنىڭ قۇرىلىسى جۇرۋدە. جىل سوڭىنا دەيىن 5 100 ورىندىق 8 مەكتەپتىڭ (4 جاڭا، 4 قوسىمشا)جانە 300 ورىندىق 2 ونەر مەكتەبىنىڭ قۇرىلىسى پايدالانۋعا بەرىلەدى. ال، 5 مەكتەپتىڭ قۇرىلىسى (2 جاڭا، 3 قوسىمشا) 2021 جىلى اياقتالادى.
ناتيجەسىندە، اپاتتى مەكتەپتەر سانى 2-دەن 1-گە، ءۇش اۋىسىمدى مەكتەپتەر سانى 19-دان 14-كە ازايادى.
«بيىل 1-سىنىپقا 24 مىڭنان استام بالا كەلەدى دەپ جوسپارلانۋدا. ءبىلىم مەكەمەلەرىنىڭ جىلىتۋ جۇيەلەرىن جوندەۋ، قىسىمداۋ جۇمىستارى تولىق اياقتالدى. جەكە قازاندىقپەن جىلىتىلاتىن 25 مەكەمەگە 4 793 توننا قاتتى جانە 190 توننا سۇيىق وتىن تاسىمالدانۋدا. قازىرگى تاڭدا اعىمداعى جوندەۋ جۇمىستارى اياقتالىپ، 15 مەكەمەگە كۇردەلى جوندەۋ جۇرگىزىلۋدە. 17 مەكتەپكە سپورت الاڭدارى، 36 مەكتەپكە ىشكى اجەتحانالار ورناتىلۋدا. سونداي-اق، سوڭعى ۇلگىدەگى بەينە باقىلاۋ كامەرالارى مەن 30 مەكتەپكە تۋرنيكەتتەر ورناتۋ ءۇشىن مەملەكەتتىك ساتىپ الۋ جۇمىستارى جۇرگىزىلىپ جاتىر» - دەدى مۇرات دۇيسەنبەكۇلى.
سونىمەن قاتار، جاڭا وقۋ جىلىندا ساتىپ الىناتىن 11-سىنىپ وقۋلىقتارى مەن قالعان سىنىپتار ءۇشىن قوسىمشا وقۋلىقتاردىڭ 60%-ى تاسىمالداندى. جۇمىستار تولىعىمەن 25 تامىزعا دەيىن اياقتالاتىن بولادى.

شىمكەنت قالاسى اكىمىنىڭ ءباسپاسوز قىزمەتى

پىكىرلەر