ەلىمىزدە كارانتينگە قاراماستان، توي تويلاۋ توقتاماي تۇر. ءبىرى «بارماساق تۋىستارىمىز رەنجيدى» دەپ اقتالسا، ەندى ءبىرى «ىندەتتى جەڭدىك» دەگەن پىكىردە.
قوعامدىق باقىلاۋ توبى مۇشەلەرىنىڭ ايتۋىنشا، كوپشىلىك جەڭىلدەتىلگەن كارانتيندى قاتە ءتۇسىنىپ، جاپپاي توي تويلاۋعا كىرىسىپ كەتكەن.
توي وتكىزۋدىڭ تىڭ ءتاسىلى تابىلدى
«قازىرگى تاڭدا 500 ادامدى جيناپ، دۇركىرەتىپ توي جاساپ جاتقاندار بار. ەڭ قىزىعى، مەيرامحانا باسشىلارى مەن توي يەلەرى جيىن وتكىزۋدىڭ تىڭ ءتاسىلىن تاۋىپتى. كەيبىرەۋلەر عيمارات ەسىگىن ىشتەن قۇلىپتاپ توي جاساۋدى شىعارعان. جۇرت ءتىپتى كۇدىك تۋعىزباس ءۇشىن مەيرامحانا الدىنا كولىكتەرىن دە قويمايدى»،- دەيدى ولار.
ماماندار ادامداردىڭ كوپ جينالۋىنىڭ سالدارىنان ينفەكتسيا قايتا ءورشۋى مۇمكىن دەگەن پىكىردە.
وسى تاقىرىپ اياسىندا «ادىرنا» ۇلتتىق پورتالى الەۋمەتتىك جەلى قولدانۋشىلارىنا «تويعا بارىپ ءجۇرسىز بە؟» دەگەن ساۋال تاستاعان بولاتىن. دەسە دە، كەيبىرى پىكىرءدى بەرمەستەن بۇرىن اتى-جوندەرىن وزگەرتۋدى سۇرادى.
مادەنيەت قىزمەتكەرى ەرداۋلەت ماكۋلوۆ توي وتكىزگەنى ءۇشىن سالىناتىن ايىپپۇل مولشەرى از ەكەنىن ايتتى.
«300-400 ادامعا توي وتكىزۋگە جاعدايى جەتكەن ادام 83 مىڭ تەڭگە ايىپپۇلدى تولەي المايدى دەپ ويلايسىزدار ما؟ توي وتكىزگەندەرگە قاتاڭ جازا قولدانعاندا عانا ەلىمىزدە توي تويلاۋ تىيىلادى»،-دەدى ول.
زامانبەك نابيەۆ:(اتى-ءجونى وزگەرتىلدى-رەد.)
– ۇكىمەتتىڭ ناقتى توي وتكىزۋگە قادالىپ قالعانى دۇرىس ەمەس. قازىر كافەلەر، ساياباقتار اشىلدى. قانشاما ادام كوشەدە قىدىرىپ ءجۇر. ءتىپتى اۆتوبۋستارىمىز ادامعا لىق تولى عوي. نەگە ءبىز وسى دۇنيەلەرگە ءمان بەرمەيمىز؟ قىزىق، ادامدار تەك تويدا جينالا ما؟ شەكتەۋ قويسا، بارلىعىنا شەكتەۋ قويۋ كەرەك. ءوز باسىم، توي وتكىزۋدى قولدايمىن. ول - قازاقتىڭ قازىناسى.
سيسەنباي ماليمباەۆ:
–اقتوبەدە الا جازداي بارلىق مەيرامحانالاردا توي بولىپ جاتىر.
مارال باقتيارقىزى:
–اللا ساقتاسىن، تويعا اپتا سايىن بارىپ ءجۇرمىز. كەشە 120 ادامدىق تويعا بارىپ كەلدىم.
ايدا ەسىم:
–كارانتين كەزىندە تويعا بارماپپىن. اللا باۋىرلارىمىزدى امان، باۋىرىمىزدى ءبۇتىن قىلسىن.
تالشىن جالميشەۆا:
–تويلار ءارى كەتسە 50 اداممەن ءۇي ىشىندە ءوتىپ جاتىر.
سامات ازاماتۇلى: (اتى-ءجونى وزگەرتىلدى-رەد.)
–توي شىمكەنت قالاسىنىڭ ىشىندە دە، سىرتىندا دا وتۋدە. كۇنى كەشە سارىاعاش اۋدانىندا بولعان 200 ادامدىق تويعا بارىپ قايتتىق. ونىڭ نەسىن جاسىرامىز، توي بارلىق ايماقتا بولىپ جاتىر عوي. قازىرگى كارانتيننىڭ ءوزى تۇسىنىكسىز بولىپ كەتتى. ارقانى كەڭگە سالىپ جىبەردىك پە دەپ تە ويلايمىن.
وكىنىشكە قاراي، قاۋىپتى ۆيرۋستان ءالى دە قۇتىلمادىق. ىندەتتى جەڭۋگە بەلسەنە اتسالىسىپ، سانيتارلىق تالاپتاردى ساقتاپ جۇرەيىك، وقىرمان!
ديانا اسان،
«ادىرنا» ۇلتتىق پورتالى
