شىمكەنت قالاسى ءال-فارابي اۋدانىندا كاسىپكەرلىك سالاسى قارقىندى تۇردە دامىپ كەلەدى. اتاپ ايتقاندا، بيىل اۋدان اۋماعىندا 24 ءىرى كاسىپكەرلىك نىسانى سالىنۋدا. العاشقى 9 ايدا 13 نىساننىڭ قۇرىلىسى اياقتالىپ، ىسكە قوسىلعان.
بۇل تۋرالى شىمكەنت قالاسىنىڭ قالا اكىمى مۇرات ايتەنوۆكە 9 ايدا اتقارىلعان جۇمىستار جونىندە ەسەپ بەرگەن ءال-فارابي اۋدانىنىڭ اكىمى عابيت ماۋلەنقۇلوۆ باياندادى.
اۋدان اكىمىنىڭ ايتۋىنشا، كاسىپكەرلىك نىساندارىنىڭ قۇرىلىسى كەزىندە جانە ولار ىسكە قوسىلعاننان كەيىن 548 ادام جۇمىسپەن قامتىلعان. جالپى، وسى نىسانداردىڭ قۇرىلىسىنا 4 ميلليارد تەڭگە ينۆەستيتسيا تارتىلدى.
بۇگىندە قالعان 11 نىساننىڭ قۇرىلىسى جالعاسۋدا. ولاردىڭ اراسىندا ورتالىق «قىرعى بازار» مەن «دارحان» بازارىن قايتا جاڭعىرتۋ جۇمىستارى بار.
«دارحان» بازارىنداعى كۇردەلى قۇرىلىس جۇمىستارى 2020 جىلى باستالىپ، 2021 جىلدىڭ جەلتوقسان ايىندا اياقتالادى دەپ جوسپارلانۋدا. قۇرىلىس جۇمىستارىنا «بيزنەستىڭ جول كارتاسى – 2025» باعدارلاماسى اياسىندا «دامۋ» كاسىپكەرلىكتى دامىتۋ قورى ارقىلى 100 ملن. تەڭگە سۋبسيديا بولىنگەن.
ەسەپ بەرۋ كەزىندە عابيت پاتشاحانۇلى قالا اكىمىنە كوپ قاباتتى تۇرعىن ۇيلەردىڭ اۋلاسىن اباتتاندىرۋ، تۇرعىن-ءۇي كوممۋنالدىق شاراۋاشىلىقتى دامىتۋ، جولداردى جوندەۋ، شالعاي ەلدى مەكەندەردى كوركەيتۋ جانە قىسقى جىلىتۋ ماۋسىمىنا دايىندىق جۇمىستارى تۋرالى باياندادى.
شىمكەنت قالاسى اكىمىنىڭ ءباسپاسوز قىزمەتى
