ەل جاستارىنىڭ 42 پايىزى ەلدەن كەتۋدى جوسپارلاپ ءجۇر. بۇل تۋرالى كومپارتيانىڭ استانا قالالىق فيليالىنىڭەكىنشى حاتشىسى ءدىلدا مايدانبەكوۆا مالىمدەدى دەپ جازادى "ادىرنا" ۇلتتىق پورتالى قازاقپارات اگەنتتىگىنە سىلتەمە جاساپ.
«ەگەر ەلدەگى دەموگرافيالىق جاعدايدى الىپ قاراساق، حالىق سانى ءوسىپ جاتقانىن بايقايمىز. قازىردىڭ وزىندە قازاقستاندا 18,6 ميلليوننان استام ادام بار. وكىنىشكە قاراي، سوڭعى ۋاقىتتا ەلدەن كەتىپ جاتقان جاستاردىڭ سانى كۇرت ارتقان. قازاقستاندا 15 پەن 29 جاس ارالىعىنداعى جاستاردىڭ 42 پايىزى شەتەلگە وقۋعا كەتۋدى نەمەسە تۇبەگەيلى كوشىپ كەتۋدى جوسپارلاپ ءجۇر»،-دەيدى د.مايدانبەكوۆا «اقىلدى جاستاردىڭ شەكارادان كوپتەپ اسۋى. سەبەپتەرى مەن مۇنى قالاي توقتاتۋعا بولادى؟» اتتى دوڭگەلەك ۇستەلدە.
سونىمەن قاتار مايدانبەكوۆا قازىر شەتەلدە ءبىلىم الىپ جۇرگەندەردىڭ 40 پايىزى ەلگە كەرى قايتپايدى دەگەن پىكىردە.«جاستاردىڭ شەكارا اسۋىنىڭ نەگىزگى سەبەبى-ءوز ەلىندە الەۋمەتتىك تۇرمىسىن رەتتەي الماۋىنان»،-دەگەن ول قازاقستاندا ورتا جاستاعىلار عانا وزدەرىن وسى ەلدە جايلى ءومىر سۇرۋدەمىز دەپ ويلايتىنىن العا تارتادى.
كوممۋنيست ءدىلدا ايتسا،ايتقانداي، قازىر «شىركىن، شەتەلگە كوشىپ كەتسەم عوي» دەپ ارماندامايتىن ادام قازاقستاندا وتە از. بۇعان سەبەپ تە جوق ەمەس. پەرزەنتحانادان باستالىپ، زيراتتا اياقتالاتىن جەمقورلىق پەن پاراقورلىق ىندەتى كەز كەلگەندى قازاقستاننان بەزدىرەدى. ءبىلىمدى جاستاردىڭ ءوز ەلىنە قىزمەت ەتۋىنە قوعامدى جايلاعان تامىر-تانىس، كوكە-جاكە ماسەلەسى ۇلكەن كەدەرگى. «ءتاۋىر جۇمىسقا تۇرۋ ءۇشىن نە كوكەڭ، نە كوك قاعازىڭ بولۋى كەرەك» دەگەن جازىلماعان زاڭ دا بار. وسىدان كەيىن كىمنىڭ مۇنداي ەلدە قالعىسى كەلەدى؟
بۇعان دەيىن دە ەلىمىزدەن شەكارا اسىپ كەتكەندەر از بولمادى. الايدا پاندەميا كەزىندە تۋعان جەرىنەن بەزىپ قاشۋعا دايىن ادامدار قازاقستاندا كۇرت كوبەيدى. تاياۋدا الەۋمەتتىك جەلىدە «شەتەلگە كوشكىڭىز كەلە مە؟» دەگەن ساۋالناما جۇرگىزىلگەنى بار ەدى. سوندا قاتىسقانداردىڭ باسىم بولىگى «مۇمكىندىگىم بولسا، بۇگىن كەتەر ەدىم» دەپ جاۋاپ بەرگەنىن بايقادىق. سول جەردەگى پىكىرلەردى وقىپ وتىرىپ، «حالقى كوروناۆيرۋستان قىناداي قىرىلىپ جاتقاندا، بار ءدارىنى بەرمەي، قويمادا تىعىپ ۇستاعان مىناداي ەلدە ادام سياقتى ولە دە المايتىنىما كوزىم جەتتى» دەگەن جازبانى كوزىمىز شالعان. ءبىر عانا سويلەمگە سىيعان بىزدەگى شىندىق-وسى.
قازاقستاننان ەشكىم دە جەتىسكەنىنەن شەتەلگە كوشپەيدى. بۇعان دەيىن الەۋمەتتىك ماسەلەلەردەن تيتىقتاعان جۇرت قازىر تۇتاس بيلىككە مۇلدەم سەنبەيدى. نەگە؟ سەبەبى، شەندى-شەكپەندىنىڭ ءسوزى مەن ءىسى ەش قابىسپايدى. الىسقا بارماي-اق، وسى جىلعى جاعدايدى مىسالعا الىپ قارايىقشى. «كوروناۆيرۋسپەن كۇرەسكە دايىنبىز» دەگەن دەنساۋلىق ساقتاۋ مينيسترلىگى بيىلعى شىلدە ايىندا نە ىستەدى؟ تىنىسى تارىلىپ، ءبىر جۇتىم اۋاعا زار بولىپ، مىڭداعان ادام باقيعا اتتاندى. ال سول شاقتا بيۋدجەتتەن ميللياردتاعان قارجىنى وسى ىندەتپەن كۇرەس ءۇشىن بولگىزىپ العان دەنساۋلىق ساقتاۋ مينيسترلىگى ناۋقاستارعا يۆل اپپاراتىن قوسىپ بەرىپ، جاندارىن ساقتاپ قالۋعا دا شامالارى كەلمەدى ەمەس پە؟!جۇمىسسىز كارانتيندە ۇيدە قامالعان حالىقتىڭ ەداۋىر بولىگىنە 42500 تەڭگە بەرىپ الدارقاتقان ۇكىمەتىمىز قالعان جۇرتتىڭ قالاي امان قالاتىنىنا كارانتيندە باس قاتىردى ما؟
قورىتا ايتقاندا، قازاقستانداعى قاي سالانى الىپ قاراساڭىز دا، بىلىققا بەلشەسىنەن باتقانىن، جەمقورلىق جايلاعانىن كورەسىز. ال مۇنداي قوعامدا ءوزى يتشىلەپ ءومىر سۇرسە دە، بالاسىنىڭ قورلانىپ ءومىر سۇرگەنىن ەشكىم قالامايدى. وسى سەبەپتەن دە بۇل ەلدەن كەتۋشىلەر سانى كوبەيمەسە، ازايمايتىنى انىق. بيلىكتەگى زەينەتكەرلەردىڭ ورنىن جاستار الماستىرمايىنشا، قوعامداعى جەمقورلىق جويىلمايىنشا، قازاقستان قارتتاردىڭ مەكەنىنە اينالعانى اينالعان.
راۋانا ديماشقىزى،
«ادىرنا» ۇلتتىق پورتالى.
