2025 جىلدىڭ 20 ماۋسىمىندا استانادا جىل سايىنعى «Jas Keñes Sıylığı» جاستار سىيلىعىنا ءوتىنىم قابىلداۋ باستالدى.
بۇل سىيلىق 2024 جىلى قازاقستان رەسپۋبليكاسى پرەزيدەنتى جانىنداعى جاستار ساياساتى جونىندەگى كەڭەستىڭ باستاماسىمەن قۇرىلعان. ونىڭ ماقساتى – ەلىمىزدىڭ ەكونوميكاسى مەن قوعامدىق ءومىرىنىڭ ءتۇرلى سالالارىندا جەتىستىككە جەتكەن جاس مامانداردى قولداۋ جانە ىنتالاندىرۋ.
بيىلعى بايقاۋدا جاڭا سالالار ەنگىزىلىپ، نوميناتسيالار سانى 7-دەن 10-عا دەيىن كەڭەيتىلدى. ەندى سىيلىققا جاس عالىمدار، جوعارى وقۋ ورىندارىنىڭ وقىتۋشىلارى مەن دارىگەرلەر، اقپاراتتىق-كوممۋنيكاتسيالىق تەحنولوگيالار، كرەاتيۆتى يندۋستريالار جانە اتوم ونەركاسىبى سالالارىنىڭ وكىلدەرى دە ۇمىتكەر بولا الادى.
بايقاۋعا 35 جاسقا تولماعان قازاقستان ازاماتتارى قاتىسا الادى. وتىنىمدەر 2025 جىلعى 20 ماۋسىم مەن 20 شىلدە ارالىعىندا www.jas-kenes.kz/application سايتىندا قابىلدانادى. ىرىكتەۋ ءۇش كەزەڭنەن تۇرادى، ناتيجەسىندە ءار نوميناتسيادان ەكى جەڭىمپاز انىقتالىپ، بارلىعى 20 جەڭىمپازعا 1 ميلليون تەڭگەدەن تابىستالادى. جۇلدە قورى – 20 ميلليون تەڭگە. سىيلىقتىڭ باس سەرىكتەسى – Brave Talents كومپانياسى.
«Jas Keñes Sıylığı» – جاستاردىڭ كاسىبي دامۋىنا سەرپىن بەرەتىن ماڭىزدى جوبا بولىپ سانالادى. سىيلىق تۋرالى تولىق اقپاراتتى www.jas-kenes.kz سايتىنان الۋعا بولادى.
