الماتىدا العاش رەت اۋقىمدى City Makers: Jastar qalasy قالالىق قاۋىمداستىقتار فەستيۆالى ءوتتى.
اشىق اسپان استىنداعى بىرەگەي شاراعا 7 000-نان استام كورەرمەن جينالدى. سونىمەن قاتار، 107 قاۋىمداستىق پەن 50-دەن استام جۇمىس بەرۋشىلەر قاتىسىپ، قالا تۇرعىندارى مەن قوناقتارىنا ءوز باستامالارى مەن الەۋمەتتىك جوبالارىن ۇسىندى. جوبا الماتى قالاسى جاستار ساياساتى باسقارماسىنىڭ قولداۋىمەن جۇزەگە استى.
City Makers – جاستاردىڭ باستامالارىن قولداۋعا، شىعارماشىلىقتى جانە سالاۋاتتى ءومىر سالتىن ناسيحاتتاۋعا جانە جاستار قاۋىمداستىقتارىنىڭ بىرىگۋىنە باعىتتالعان جاڭا فورماتتاعى الاڭ. مۇندا قاۋىمداستىقتار, مادەني باستامالار جانە قالاداعى ءتۇرلى ورتالىقتار باس قوسىپ، تاجىريبە الماسىپ، جاڭا سەرىكتەستىك بايلانىستار ورناتتى. قاتىسۋشىلار ءۇشىن بۇل تەك كورمە ەمەس، سونىمەن بىرگە جان-جاقتى نەتۆوركينگ الاڭى بولدى. فەستيۆالگە كەلگەن جاستار وزدەرىنە ۇناعان باعىتتار بويىنشا قاۋىمداستىقتارعا جازىلىپ، الداعى ۋاقىتتا بەلسەندى مۇشەسى بولۋعا نيەت ءبىلدىردى.
ء«بىز بۇگىنگى شارا ارقىلى قالامىزداعى ەڭ بەلسەندى قاۋىمداستىقتاردى ءبىر الاڭعا جيناپ، قالا تۇرعىندارىنا تانىستىرۋدى ماقسات ەتتىك. بۇل – الماتى جاستارىنىڭ الەۋەتىن اشىپ، ولاردىڭ قوعامعا قوسىپ جاتقان ۇلەسىن كەڭىنەن دارىپتەۋگە ارنالعان ەرەكشە باستاما. وسىنداي جوبالار ارقىلى ازاماتتىق جاۋاپكەرشىلىگى جوعارى، شىعارماشىل ءارى بەلسەندى بۋىن قالىپتاسادى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
فەستيۆال باعدارلاماسى دا ەرەكشە بولدى. قوناقتار «قامقورلىق داڭعىلى»، ء«تارتىپ داڭعىلى»، «ەكو Town»، «شىعارماشىلىق شاعىن اۋدانى» سىندى ارنايى ايماقتاردى ارالاپ، تەاترلىق جانە مۋزىكالىق قويىلىمداردى تاماشالادى. سونىمەن قاتار، شەبەرلىك ساباقتارىنا قاتىسىپ، پىكىرتالاس الاڭدارىندا وزەكتى ماسەلەلەردى تالقىلاپ، سپورتتىق ويىندارعا قاتىستى. الەۋمەتتىك جانە ەكولوگيالىق جوبالاردىڭ تانىستىرىلىمدارى كورەرمەندەرگە ەرەكشە اسەر قالدىردى.
فەستيۆال جاستاردى الەۋمەتتەندىرۋدىڭ تىڭ قۇرالى رەتىندە دە باعالاندى. اسىرەسە ايماقتاردان الماتىعا كەلگەن ستۋدەنتتەر قالا ومىرىنە بەيىمدەلىپ، ءوز قىزىعۋشىلىقتارىنا سايكەس قاۋىمداستىقتاردى تاۋىپ، جاڭا ورتاعا تەز ءسىڭىسۋ مۇمكىندىگىنە يە بولدى. بۇل باستاما ولاردىڭ بەلسەندىلىگىن ارتتىرىپ قانا قويماي، ۇلكەن مەگاپوليستەگى ومىرگە سەنىمدى قادام باسۋىنا جول اشتى.
فەستيۆالگە قاتىسقان ءبىرىنشى كۋرس ستۋدەنتى ايدانا سەيىتوۆا: «مەن الماتىعا ەندى عانا كەلدىم. بۇگىن وزىمە قىزىق بىرنەشە قاۋىمداستىق تاۋىپ، جازىلىپ قويدىم. وسىنداي شارانى ۇيىمداستىرعا، ۇيىمداستىرۋشىلارعا ەرەكشە العىسىمىدى بىلدىرەمىن», – دەپ اسەرىمەن ءبولىستى.
City Makers: Jastar qalasy فەستيۆالى الماتىلىق جاستاردىڭ جىگەرى مەن شىعارماشىلىق الەۋەتىن، ولاردىڭ قالا ومىرىنە بەلسەندى قاتىسىپ، قوعامنىڭ دامۋىنا ۇلەس قوسۋعا دەگەن تالپىنىسىن كورسەتتى. ۇيىمداستىرۋشىلاردىڭ ايتۋىنشا، الداعى ۋاقىتتا فەستيۆال ءوز اۋقىمىن كەڭەيتىپ، جالعاسىن تابادى.
