قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ بۇگىن ەلدەگى ساياسي جاعدايعا بايلانىستى قىرعىزستاندىقتارعا كەزەكتى مالىمدەمە جاسادى، دەپ حابارلايدى "ادىرنا"ۇلتتىق پورتالى.
«قۇرمەتتى وتانداستار!
ەلدەگى ساياسي جاعداي شيەلەنىسىپ كەتتى.
بۇل جاعدايدى رەتتەۋ ءۇشىن ءبىز مىناداي قادامدار جاساۋعا ءتيىسپىز.
جوگوركۋ كەنەشتى سايلاۋ ناتيجەلەرى جويىلدى. ەندى جاڭا پارلامەنت سايلاۋى تاعايىندالۋى كەرەك. بۇل تۋرالى شەشىمدى وسك قابىلدايدى. بۇل شارالار قازىرگى ساياسي شيەلەنىستى جەڭىلدەتەدى.
سونىمەن قاتار، داعدارىسقا دەيىن جۇمىس ىستەگەن پرەمەر-مينيستر مەن ۇكىمەت مۇشەلەرىن وتستاۆكاعا جىبەرۋ قاجەت، بۇل جاڭا تاعايىنداۋلارعا زاڭدى نەگىز بولادى. جاڭا پرەمەر-مينيستر مەن ۇكىمەت مۇشەلەرىن تاعايىنداۋدى زاڭداستىرۋ ءۇشىن جوگوركۋ كەنەشتىڭ قاۋلىسى مەن پرەزيدەنتتىڭ جارلىعى قاجەت. مەن ءتيىستى جارلىقتارعا قول قويۋعا دايىنمىن، جوگوركۋ كەنەشتىڭ قاۋلىلارىن كۇتەمىن.
پارلامەنت مۇشەلەرى ءوز مىندەتتەرىن ورىنداۋى ءۇشىن قۇقىق قورعاۋ ورگاندارى جوگوركۋ كەنەش دەپۋتاتتارىنىڭ قاۋىپسىزدىگىن قامتاماسىز ەتۋى ءتيىس.
قىمباتتى وتانداستار! بۇعان دەيىن ايتقانىمداي، مەن بولىپ جاتقان كادرلىق وزگەرىستەردى زاڭداستىرۋعا نيەتتىمىن. مەن ءۇشىن ەشقانداي لاۋازىم مەملەكەتتىڭ تۇتاستىعىنان، حالىقتىڭ بىرلىگى مەن قوعامنىڭ تىنىشتىعىنان جوعارى ەمەس.
ءبىز قازىرگى جاعدايدى مۇمكىندىگىنشە تەزىرەك قۇقىقتىق قالىپقا قايتارۋىمىز كەرەك. اتقارۋشى بيلىك ورگاندارىنىڭ زاڭدى باسشىلارى بەكىتىلگەننەن كەيىن جانە ەلدە زاڭ ۇستەمدىك قۇرعاننان كەيىن قىرعىز رەسپۋبليكاسىنىڭ پرەزيدەنتى قىزمەتىنەن كەتۋگە دايىنمىن.
بارلىق ساياسي كۇشتى ەلدەگى بەيبىتشىلىك پەن تىنىشتىقتى ساقتاۋعا، حالىقتى بولمەۋگە جانە قوعامدى بولىنبەۋگە شاقىرامىن. جاراتقان يە بارلىق ساياسي كۇشكە دانالىق پەن شىدامدىلىق بەرسىن!»، - دەلىنگەن قىرعىستان پرەزيدەنتىنىڭ رەسمي سايتىنادا.
