Qyrǵyz Respýblıkasynyń Prezıdenti Sooronbaı Jeenbekov búgin eldegi saıası jaǵdaıǵa baılanysty qyrǵyzstandyqtarǵa kezekti málimdeme jasady, dep habarlaıdy "Adyrna"ulttyq portaly.
«Qurmetti otandastar!
Eldegi saıası jaǵdaı shıelenisip ketti.
Bul jaǵdaıdy retteý úshin biz mynadaı qadamdar jasaýǵa tıispiz.
Jogorký Keneshti saılaý nátıjeleri joıyldy. Endi jańa parlament saılaýy taǵaıyndalýy kerek. Bul týraly sheshimdi OSK qabyldaıdy. Bul sharalar qazirgi saıası shıelenisti jeńildetedi.
Sonymen qatar, daǵdarysqa deıin jumys istegen Premer-Mınıstr men Úkimet múshelerin otstavkaǵa jiberý qajet, bul jańa taǵaıyndaýlarǵa zańdy negiz bolady. Jańa Premer-Mınıstr men Úkimet múshelerin taǵaıyndaýdy zańdastyrý úshin Jogorký Keneshtiń qaýlysy men Prezıdenttiń Jarlyǵy qajet. Men tıisti Jarlyqtarǵa qol qoıýǵa daıynmyn, Jogorký Keneshtiń qaýlylaryn kútemin.
Parlament músheleri óz mindetterin oryndaýy úshin quqyq qorǵaý organdary Jogorký Kenesh depýtattarynyń qaýipsizdigin qamtamasyz etýi tıis.
Qymbatty otandastar! Buǵan deıin aıtqanymdaı, men bolyp jatqan kadrlyq ózgeristerdi zańdastyrýǵa nıettimin. Men úshin eshqandaı laýazym memlekettiń tutastyǵynan, halyqtyń birligi men qoǵamnyń tynyshtyǵynan joǵary emes.
Biz qazirgi jaǵdaıdy múmkindiginshe tezirek quqyqtyq qalypqa qaıtarýymyz kerek. Atqarýshy bılik organdarynyń zańdy basshylary bekitilgennen keıin jáne elde zań ústemdik qurǵannan keıin Qyrǵyz Respýblıkasynyń Prezıdenti qyzmetinen ketýge daıynmyn.
Barlyq saıası kúshti eldegi beıbitshilik pen tynyshtyqty saqtaýǵa, halyqty bólmeýge jáne qoǵamdy bólinbeýge shaqyramyn. Jaratqan Ie barlyq saıası kúshke danalyq pen shydamdylyq bersin!», - delingen Qyrǵystan Prezıdentiniń resmı saıtynada.
