يرانداعى رەجيمگە قارسى نارازىلىق بىلدىرۋشىلەر ەل اۋماعىنداعى بىرنەشە كوشەنىڭ اتاۋىن «دونالد ترامپ كوشەسى» دەپ وزگەرتتى. اقش مەملەكەتتىك دەپارتامەنتى بۇل قادامدى يران حالقىنىڭ ەركىندىك پەن وركەندەۋگە ۇمتىلىسىن قولداۋدىڭ سيمۆولى دەپ اتادى، دەپ حابارلايدى «ادىرنا» ءتىلشىسى.
ء«بىز تەگەراندا پرەزيدەنت ترامپتىڭ اتىمەن كوشەگە اتاۋ بەرگەن ءانونيمدى ازاماتتىڭ ارەكەتىن جوعارى باعالايمىز»، — دەلىنگەن حابارلامادا.
ۆەدومستۆو وكىلدەرى اقش يران حالقىنىڭ ۇمتىلىسىن قۇرمەتتەيتىنىن جانە ولاردىڭ ەركىندىككە، ءال-اۋقاتقا جانە مۇمكىندىكتەرگە قول جەتكىزۋ جولىنداعى تالپىنىستارىن قولداۋعا بەيىلدى ەكەنىن اتاپ ءوتتى.
ايتا كەتەيىك، جەلتوقسان ايىنىڭ سوڭىندا يراندا ۇلتتىق ۆاليۋتانىڭ كۇرت قۇنسىزدانۋى اياسىندا جاپپاي نارازىلىقتار باستالعان. ولار قاۋىپسىزدىك شارالارىنىڭ كۇشەيۋىمەن، سونىڭ ىشىندە كوزدەن جاس اعىزاتىن گاز بەن پنەۆماتيكالىق قارۋدىڭ قولدانىلۋىمەن قاتار ءجۇردى. نارازىلىق اكتسيالارى ەلدىڭ 25 پروۆينتسياسىنداعى 60-تان استام قالانى قامتىدى. ەڭ ءىرى شەرۋلەر تەگەراندا ءوتتى، ال ەڭ قاقتىعىستى جاعدايلار ەلدىڭ باتىسى مەن وڭتۇستىك-باتىسىندا — مالەكشاحي، كەرمانشاح جانە لوردەگان قالالارىندا تىركەلدى.
