اۋعانستاننىڭ تاحار پروۆينتسياسىنداعى چاح-اب وكرۋگىنىڭ تۇرعىندارى وڭىردە التىن وندىرۋگە قارسى نارازىلىق ءبىلدىرىپ، تالىپتەرگە شابۋىل جاسادى. بۇل تۋرالى Afghanistan International جازدى، دەپ حابارلايدى «ادىرنا» ءتىلشىسى،
باسىلىمىنىڭ دەرەگىنشە، وقيعا سالدارىنان كەمىندە ءۇش نارازىلىق ءبىلدىرۋشى مەن راديكالدى قوزعالىستىڭ ءبىر وكىلى قازا تاۋىپ، شامامەن 20 ادام جاراقات العان.
اۋعانستاننىڭ تاۋ-كەن ونەركاسىبى جانە مۇناي مينيسترلىگىنىڭ ءباسپاسوز حاتشىسى حۋمايۋن افگان اقپاراتتى راستادى. ونىڭ ايتۋىنشا، وقيعا ادام شىعىنى مەن قارجىلىق زالالعا اكەلگەن، الايدا ناقتى دەرەكتەر جاريالانباعان. قازىر جاعدايدى تەكسەرۋ ءۇشىن ارنايى كوميسسيا جىبەرىلگەن، ونىڭ قورىتىندىسى كەيىنىرەك حابارلانادى.
جۋرناليستەردىڭ مالىمەتىنشە، تاحار تۇرعىندارى التىن ءوندىرۋدى زاڭسىز دەپ سانايدى. سەبەبى تالىپتەر جوبالاردى جۇزەگە اسىرىپ جاتقان كومپانيالار تۋرالى تولىق اقپارات بەرمەيدى. سونىمەن قاتار، نارازىلار بۇل كاسىپورىنداردىڭ قىزمەتى ەكولوگيالىق جاعدايدى ناشارلاتىپ، سۋ تاپشىلىعىنا اكەلىپ وتىرعانىن ايتادى.
التىن ءوندىرىلىپ جاتقان اۋماقتاردىڭ ماڭىندا ءتۇتىن باعاندارى بايقالعان. بەلسەندىلەر كەنشىلەردىڭ جابدىقتارىن ورتەگەنى حابارلاندى. قاۋىپسىزدىك احۋالىنىڭ ۋشىعۋىنا بايلانىستى التىن ءوندىرۋشى كومپانيالاردىڭ توپ-مەنەدجەرلەرى پروۆينتسيادان قاشىپ كەتكەن. باق دەرەگىنە سۇيەنسەك، بۇل كاسىپورىنداردى تالىپتەردىڭ نەگىزگى قارجىلاي دەمەۋشىلەرىنىڭ ءبىرى سانالاتىن باشار نۋرزاي باقىلاپ وتىر.
كۋاگەرلەردىڭ ايتۋىنشا، جەرگىلىكتى حالىق سوڭىنا دەيىن بارعىسى كەلەدى، سوندىقتان نارازىلار مەن تالىپتەر اراسىندا جاڭا قاقتىعىستار بولۋى مۇمكىن.
2021 جىلى راديكالدى قوزعالىس بيلىككە كەلگەنگە دەيىن جۇمىس ىستەگەن اۋعان پارلامەنتىنىڭ بۇرىنعى وكىلى ناسيم مودابەر تالىپتەر تۇسىنداعى پايدالى قازبالاردى باقىلاۋسىز ءوندىرۋدى ۇلتتىق بايلىقتى توناۋ دەپ باعالادى. ونىڭ ايتۋىنشا، كاسىپكەرلەرمەن جاسالاتىن كەلىسىمشارتتار اشىق ەمەس، ال جەرگىلىكتى حالىقتىڭ مۇددەسى ەسكەرىلمەيدى.
اۋعانستان ەكونوميكاسى جونىندەگى ساراپشى مۋزامميل شينۆاري ەلدەگى التىن قورى 300–500 مەترلىك توننا ارالىعىندا ەكەنىن، ونىڭ قۇنى ونداعان ميلليارد دوللارمەن ەسەپتەلەتىنىن ايتتى. التىن كەن ورىندارى نەگىزىنەن تاحار پروۆينتسياسى مەن باداحشان پروۆينتسياسىندا شوعىرلانعان. ساراپشى تالىپتەردىڭ جوبالار تۋرالى اقپاراتتى جاريالاماۋىن سىنعا الدى. سونىڭ سالدارىنان قاي كومپانيالار ءوندىرىس جۇرگىزىپ جاتقانى، جوبالاردىڭ بيۋدجەتى مەن تابىسى بەلگىسىز. ونىڭ پىكىرىنشە، تابيعي رەسۋرستارعا، سونىڭ ىشىندە التىن مەن مۇنايعا وسىنداي بەيبەرەكەت كوزقاراس ۇزاق مەرزىمدە ولاردىڭ سارقىلۋىنا الىپ كەلۋى مۇمكىن.
