قىتايلىق عارىشكەرلەر ەل تاريحىندا العاش رەت ۇڭگىر جاعدايىندا وتكەن دايىندىق باعدارلاماسىن ءساتتى اياقتادى، دەپ حابارلايدى «ادىرنا» ءتىلشىسى.
وقۋ-جاتتىعۋلار ەلدىڭ وڭتۇستىك-باتىسىنداعى چۋنتسين مۋنيتسيپاليتەتىنىڭ تاۋلى اۋدانىندا ۇيىمداستىرىلعان. دايىندىققا 28 عارىشكەر قاتىسىپ، ولار 4 توپقا بولىنگەن. ءار توپ سۋىق ءارى ىلعالدى جەراستى جاعدايىندا 6 كۇن، 5 تۇننەن وتكىزگەن. بۇل باعدارلاما ۇزاق مەرزىمدى وربيتالىق ۇشۋلار مەن بولاشاق ايعا باعىتتالعان پيلوتتالاتىن ميسسيالار الدىندا تىرشىلىك ەتۋ داعدىلارى مەن پسيحولوگيالىق توزىمدىلىكتى پىسىقتاۋعا ارنالعان.
ينتەنسيۆتى باعدارلاما ناقتى ميسسيالاردىڭ تالاپتارىنا بارىنشا جاقىنداتىلىپ، قىتاي عارىشكەرلەرىن دايارلاۋ جۇيەسىن كەڭەيتۋ ماقساتىندا ازىرلەنگەن. باعدارلاما اياسىندا ەكولوگيالىق مونيتورينگ, ۇڭگىرلەردى كارتوگرافيالاۋ, «عارىش–جەر» بايلانىسىن يميتاتسيالاۋ, سونداي-اق پسيحولوگيالىق جانە مىنەز-قۇلىقتىق دايىندىق جۇرگىزىلگەن.
سونىمەن قاتار نۇسقاۋشىلار توسىن ەۆاكۋاتسيالار ۇيىمداستىرىپ، كوماندالاردىڭ توتەنشە جاعدايلارعا ارەكەت ەتۋ قابىلەتىن جانە بىرلەسىپ ماسەلە شەشۋ داعدىلارىن تەكسەرگەن.
«بۇل دەرەكتەر عارىش ستانتسياسىنداعى ۇزاق مەرزىمدى ميسسيالارعا جانە ايعا باعىتتالعان پيلوتتالاتىن ۇشۋلارعا قاتىساتىن عارىشكەرلەر ءۇشىن پسيحولوگيالىق قولداۋ جۇيەلەرىنقۇرۋعا ماڭىزدى نەگىز بولادى»،- دەدى قىتايدىڭ عارىشكەرلەردى زەرتتەۋ جانە دايارلاۋ ورتالىعىنىڭ نۇسقاۋشىسى تسزيان يۋان.
ول الداعى ۋاقىتتا مۇنداي ينتەنسيۆتى باعدارلامالاردى تۇراقتى تۇردە وتكىزۋدى جوسپارلاپ وتىرعانىن مالىمدەدى.
