اقتوبە وبلىسىندا شەت ەلدەردەن كەلگەندەرگە 440 ورىندىق ءۇش كارانتين ستاتسيونارى اشىلدى

553

ءوڭىر باسشىسى وڭداسىن ءورازاليننىڭ توراعالىعىمەن وتكەن اپپاراتتىق جيىندا جىلىتۋ ماۋسىمىنا دايىندىققا، سانيتارلىق-ەپيدەميولوگيالىق جاعدايعا بايلانىستى سۇراقتار قارالدى.
جيىنعا وبلىس اكىمىنىڭ ورىنباسارلارى، باسقارما باسشىلارى جانە اقتوبە قالاسى مەن اۋدان اكىمدەرى بەينەبايلانىس ارقىلى قاتىستى.

وبلىس اكىمىنىڭ ءبىرىنشى ورىنباسارى نۇرجاۋعان قالاۋوۆ وڭىردەگى ەپيدەميولوگيالىق جاعدايدىڭ تۇراقتى ەكەنىن جەتكىزدى.
«كوروناۆيرۋس ىندەتىنىڭ جاڭا جاعدايلارى انىقتالعان جوق. ناۋقاستاردىڭ 98,3%-ى اۋرۋحانادان شىقتى. توسەك ورىن جۇكتەمەسى 78%-دان 14,6%-عا دەيىن ازايدى. 315 ينفەكتسيالىق كەرەۋەت دايىندالدى. رەزەرۆتە ءالى 3588 كەرەۋەت بار. التى زەرتحانادا 155 544 پتسر تەستى، 21 653 ەكسپرەسس-تەست الىندى»،- دەگەن نۇرجاۋعان قالاۋوۆ قازاقستان شەكاراسىنداعى وتكىزۋ بەكەتتەرىندە كوروناۆيرۋس ينفەكتسياسىنىڭ الدىن الۋ شارالارى اياسىندا 6 قازاننان باستاپ 440 كەرەۋەتى بار كارانتيندىك ستاتسيونارلاردىڭ جۇمىس جاساي باستايتىندارىن ايتتى.
72 ساعات ىشىندە COVID-19-عا پتسر ارقىلى تەست تاپسىرعاندىعى تۋرالى انىقتاماسى جوق شەت ەلدەن كەلگەن ازاماتتار ەكى تاۋلىككە ا.دوسجانوۆا اتىنداعى جاتاقحاناعا، مارتوك اۋدانى جايساڭ اۋىلىنداعى كوللەدجگە، قارعالى اۋدانى الىمبەت اۋىلىنداعى ينتەرناتقا جاتقىزىلاتىن بولادى.
بۇعان قوسا وڭىردە جاعدايدىڭ بولجامدى ناشارلاۋىنا دايىندىق كۇشەيتىلدى.
ستاتسيونارلارداعى كەرەۋەتتەر سانى قاجەت بولعان جاعدايدا 315-تەن 3603-كە دەيىن، سونىڭ ىشىندە رەانيماتسيالىق بولمەلەردەگى كەرەۋەتتىەر سانى 401-گە ارتادى.
مەديتسينالىق مەكەمەلەردىڭ ماتەريالدىق-تەحنيكالىق بازاسىن كۇشەيتۋ، جابدىقتاۋ شارالارى قابىلداندى.
1547 توسەك ورىننىڭ 93%-ى وتتەگىمەن، ءۇش ستاتسيونار ورتالىقتاندىرىلعان وتتەگىمەن قامتىلعان. مەديتسينا مەكەمەلەرىندە ءدارى-دارمەكتەر مەن جەكە قورعانىس زاتتارىنىڭ ەكى ايلىق قورى جاساقتالدى.
37 باقىلاۋ توبى مىڭنان اسا زاڭ بۇزۋشىلىقتى انىقتاپ، 633 ادام جاۋاپقا تارتىلدى، 79 ملن تەڭگە ايىپپۇل سالىندى.
وبلىس اكىمى شەت ەلدەردەن كەلگەن ءوڭىر تۇرعىندارىنا ساقتانۋ شارالارىن ساقتاۋ، باقىلاۋ توپتارىنىڭ جۇمىستارى تۋرالى اقپاراتتىق-ءتۇسىندىرۋ جۇمىستارىن كۇشەيتۋدى تاپسىردى.
سونداي-اق، جىلىتۋ ماۋسىمىنا قاتىستى سۇراق تا قارالدى.
نۇرجاۋعان قالاۋوۆ بارلىق اۆتونومدى قازاندىقتاردىڭ، ينجەنەرلىك جۇيەلەردىڭ، الەۋمەتتىك نىسانداردىڭ جىلىتۋ ماۋسىمىنا تولىقتاي دايىن ەكەندەرىن باياندادى.
اۋدانداردا 397 ءبىلىم بەرۋ نىسانى، 204 دەنساۋلىق ساقتاۋ، 75 الەۋمەتتىك نىسان، 271 تۇرعىن ءۇي جىلۋمەن جابدىقتالعان. اقتوبەدە مەكتەپتەر 87,5%، بالاباقشالار 86,7%، مەكتەپكە دەيىنگى مەكەمەلەر 64,7%، مەديتسينالىق نىساندار 62,9% جىلۋمەن قامتىلدى. 427 كوپپاتەرلى ءۇي ورتالىقتاندىرىلعان جىلۋعا قوسىلدى. بيۋدجەتتىك ۇيىمدار قاتتى وتىنمەن تولىق قامتىلدى.
وڭداسىن ورازالين اقتوبە قالاسى مەن اۋدان اكىمدەرىن وسى سۇراقتى ۇنەمى باقىلاۋدا ۇستاۋدى، جىلىتۋ ماۋسىمى كەزىندە كوممۋنالدىق جەلىلەردەگى تەحنولوگيالىق زاڭبۇزۋشىلىقتاردى جويۋ بويىنشا جەدەل شارالار قابلداۋدى تاپسىردى.

اقتوبە وبلىسى

پىكىرلەر
رەداكتسيا تاڭداۋى