ەلىمىزدە قۇمار ويىنىنا سالىنىپ كەتكەن ازاماتتاردىڭ سانى كۇن ساناپ ارتىپ كەلەدى. كارانتين كەزىندە بۋكمەكەرلىك كەڭسەلەردىڭ جۇمىسى توقتاماعان-دى. ويىن اۆتوماتتارىنا قويىلعان شەكتەۋلەرگە قاراماستان، تۇركىستان وبلىسى، سايرام اۋدانى، قارابۇلاق ەلدى مەكەنىندە «Total bet» بۋكمەكەرلىك كەڭسەسىنىڭ جۇمىسى قارقىندى تۇردە ءجۇرىپ جاتىر. بۇل تۋرالى اۋىل تۇرعىنى ءسانيا شاحاەۆا (اتى- ءجونى وزگەرتىلدى – رەد.) حابارلادى.
«-سالەمەتسىزدەر مە، «ادىرنا» ۇلتتىق پورتالى. مەن تۇركىستان وبلىسى، سايرام اۋدانى، قارابۇلاق ەلدى مەكەنىنىڭ تۇرعىنىمىن. قازىرگى تاڭدا اۋىلىمىزدا زاڭسىز قۇمار ويىندارى بيزنەسى قىزىپ جاتىر. تەپسە تەمىر ۇزەتىن ەر بالالارىمىز تاڭنان كەشكە دەيىن سول جەردەن شىقپايدى. اۋىلىمىزدىڭ بەرەكەسى قاشتى. سىزدەردەن كەڭسەنىڭ جابىلۋىنا كومەك بەرۋلەرىڭىزدى سۇرايمىز. ءبىزدىڭ جانايقايىمىز جوعارى جاققا جەتسە ەكەن»،-دەدى وقىرمان.
ءبىز ماسەلەنىڭ انىق-قانىعىنا جەتۋ ماقساتىندا قارابۇلاق اۋىلدىق وكرۋگى اكىمىنىڭ ورىنباسارى باحتيار ابدۋكاريمۇلىنا حابارلاستىق.
باحتيار ابدۋكاريمۇلى:
«-كارانتين كەزىندە بارلىق ويىن-ساۋىق ورتالىقتارىنىڭ جۇمىسىنا تىيىم سالىندى. تامىز ايىندا تۇرعىندار بۋكمەكەرلىك كەڭسەنىڭ ۇستىنەن ارىز تۇسىرگەن بولاتىن. سول كەزدە ءتيىستى ورگاندارعا حابارلاسىپ، ولاردىڭ جۇمىسىن توقتاتتىق. كەشە كەشكىلىك رەيد جۇمىستارىن جۇرگىزدىك. الايدا، بۋكمەكەرلىك كەڭسە جابىق بولدى. ءبىز الداعى ۋاقىتتا ماسەلەنى قايتا قولعا الىپ، پوليتسيا مەن كىرىستەر باسقارماسىنا حات جولدايمىز»,-دەپ سەندىردى ول.
«ادىرنا» تىلشىلەرى بۇل ماسەلەنى ءوز نازارىندا ۇستايتىن بولادى.
«ادىرنا» ۇلتتىق پورتالى
