Elimizde qumar oıynyna salynyp ketken azamattardyń sany kún sanap artyp keledi. Karantın kezinde býkmekerlik keńselerdiń jumysy toqtamaǵan-dy. Oıyn avtomattaryna qoıylǵan shekteýlerge qaramastan, Túrkistan oblysy, Saıram aýdany, Qarabulaq eldi mekeninde «Total bet» býkmekerlik keńsesiniń jumysy qarqyndy túrde júrip jatyr. Bul týraly aýyl turǵyny Sánııa Shahaeva (aty- jóni ózgertildi – red.) habarlady.
«-Sálemetsizder me, «Adyrna» ulttyq portaly. Men Túrkistan oblysy, Saıram aýdany, Qarabulaq eldi mekeniniń turǵynymyn. Qazirgi tańda aýylymyzda zańsyz qumar oıyndary bıznesi qyzyp jatyr. Tepse temir úzetin er balalarymyz tańnan keshke deıin sol jerden shyqpaıdy. Aýylymyzdyń berekesi qashty. Sizderden keńseniń jabylýyna kómek berýlerińizdi suraımyz. Bizdiń janaıqaıymyz joǵary jaqqa jetse eken»,-dedi oqyrman.
Biz máseleniń anyq-qanyǵyna jetý maqsatynda Qarabulaq aýyldyq okrýgi ákiminiń orynbasary Bahtııar Abdýkarımulyna habarlastyq.
Bahtııar ABDÝKARIMULY:
«-Karantın kezinde barlyq oıyn-saýyq ortalyqtarynyń jumysyna tyıym salyndy. Tamyz aıynda turǵyndar býkmekerlik keńseniń ústinen aryz túsirgen bolatyn. Sol kezde tıisti organdarǵa habarlasyp, olardyń jumysyn toqtattyq. Keshe keshkilik reıd jumystaryn júrgizdik. Alaıda, býkmekerlik keńse jabyq boldy. Biz aldaǵy ýaqytta máseleni qaıta qolǵa alyp, polıııa men kirister basqarmasyna hat joldaımyz»,-dep sendirdi ol.
«Adyrna» tilshileri bul máseleni óz nazarynda ustaıtyn bolady.
«Adyrna» ulttyq portaly
