ساتسىزدىك كەز كەلگەن ادامنىڭ باسىنان وتەدى. دەسە دە، توسقاۋىلدارعا مويىماي، سوڭىنا دەيىن كۇرەسە بىلگەن جاندار كەمدە-كەم. «ادىرنا» ۇلتتىق پورتالى ساتسىزدىكتى ساتتىلىككە اينالدىرعان تانىمال تۇلعالاردىڭ وقيعالارىن نازارلارىڭىزعا ۇسىنادى.
- ستيۆەن سپيلبەرگ - ەڭ تابىستى رەجيسسەرلەردىڭ ءبىرى. ول وڭتۇستىك كاليفورنيا ۋنيۆەرسيتەتىنە ءتۇسۋ ءۇشىن ءۇش رەت ەمتيحان تاپسىرىپ، ۇشەۋىندە دە «تالانتسىز» دەپ باعالانىپ، وتپەي قالعان. جاس تالانت سول كەزدە ءوز ارمانىنان باس تارتقان جاعدايدا، ءبىز ونىڭ «شيندلەر ءتىزىمى»، «قاتارداعى راياندى قۇتقارۋ» سىندى تۋىندىلارىن كورە المايتىن ەدىك.
- KFC فاستفۋد جەلىسىنىڭ نەگىزىن قالاۋشى دەۆيد ساندەرس 65 جاسىندا جەكە بيزنەسىن باستاۋعا شەشىم قابىلداعان. ول العاشقى رەستورانىن اشامىن دەگەنشە تاۋىق قاناتتارىنىڭ رەتسەبىن جاساۋدا 1009 رەت قاتەلەسكەن ەكەن.
- بريتاندىق ونەرتاپقىش دجەيمس دايسون 1993 جىلى ساڭىلاۋسىز شاڭسورعىشتى ويلاپ تاپقان بولاتىن. ول ءونىمىن نارىققا شىعارماس بۇرىن 15 جىل بويى زەرتحانادا ەڭبەك ەتىپ، شاڭسورعىشتىڭ 5127 ءپروتوتيپىن جاساعان. «5126 ساتسىزدىكتىڭ ارقايسىسى ماعان ءبىر نارسە ۇيرەتتى»،-دەيدى ول.
- تانىمال امەريكالىق باسكەتبولشى مايكل دجوردان حح عاسىردىڭ 80-جىلدارى «بولاشاعىنان ءۇمىت كۇتتىرەتىن» 300 ويىنشىنىڭ تىزىمىنە دە كىرمەگەن. ول دوپتى كارزەڭكەگە 9000 مارتە سالا الماي، 300-گە جۋىق ويىندا جەڭىلىسكە ۇشىراعان. الايدا، دجوردان ساتسىزدىكتەرگە مويىماي، ۇلتتىق باسكەتبول قاۋىمداستىعىنىڭ التى دۇركىن چەمپيونى اتانىپ، ءوز ماقساتىنا جەتە ءبىلدى.
- «مەن ەشقاشان جەڭىلگەن ەمەسپىن. تەك جۇزەگە اسپايتىن 10 000 ءتاسىلدى بايقاپ كوردىم. تابىسقا جەتۋدىڭ ەڭ سەنىمدى جولى — تاعى ءبىر رەت قايتالاپ كورۋ». بۇل - ەلەكتر شامىن ويلاپ تاپقان ايگىلى ونەرتاپقىش جانە كاسىپكەر توماس ەديسوننىڭ سوزدەرى. عالىم ءساتسىز ارەكەتتەردىڭ سانى بويىنشا رەكورد ورناتتى. ول لامپانى جەتىلدىرۋ جولىندا 10 000 مارتە سىناق جاساعان.
ال ءسىز ماقساتىڭىزعا جەتۋ ءۇشىن قانشا رەت ارەكەت جاسادىڭىز؟
ديانا اسان،
«ادىرنا» ۇلتتىق پورتالى
