شۆەيتساريانىڭ فەدەرالدىق كەڭەسى ۆەنەسۋەلا پرەزيدەنتى نيكولاس مادۋروعا جانە ونىمەن بايلانىستى تۇلعالارعا تيەسىلى كەز كەلگەن اكتيۆتەردى بۇعاتتاۋ تۋرالى شەشىم قابىلدادى. بۇل جونىندە ەل ۇكىمەتىنىڭ مالىمدەمەسىندە ايتىلدى، دەپ حابارلايدى «ادىرنا» ءتىلشىسى.
«2026 جىلعى 5 قاڭتاردا فەدەرالدىق كەڭەس شۆەيتساريا اۋماعىندا نيكولاس مادۋروعا جانە ونىمەن بايلانىستى وزگە دە تۇلعالارعا تيەسىلى بارلىق اكتيۆتەردى دەرەۋ بۇعاتتاۋ تۋرالى شەشىم قابىلدادى. فەدەرالدىق كەڭەستىڭ ماقساتى – اكتيۆتەردىڭ شەتەلگە شىعارىلۋىنا جول بەرمەۋ»، – دەلىنگەن ۇكىمەتتىڭ ءباسپاسوز حابارلاماسىندا.
اكتيۆتەردى بۇعاتتاۋ تۋرالى شەشىم «ۆەنەسۋەلانىڭ قازىرگى ۇكىمەت مۇشەلەرىنىڭ ەشقايسىسىنا قاتىستى ەمەس» جانە «ساقتىق شاراسى رەتىندە» ەنگىزىلگەن.
«ەگەر الداعى سوت پروتسەستەرى بارىسىندا قاراجاتتىڭ زاڭسىز جولمەن الىنعانى انىقتالسا، شۆەيتساريا ولاردىڭ ۆەنەسۋەلا حالقىنىڭ يگىلىگىنە جۇمسالۋىنا بار كۇشىن سالادى. اكتيۆتەردى بۇعاتتاۋ 2018 جىلدان بەرى ەمبارگو تۋرالى زاڭعا سايكەس ەنگىزىلگەن ۆەنەسۋەلاعا قارسى سانكتسيالار اياسىندا جۇزەگە اسىرىلىپ وتىر»، – دەپ حابارلادى كونفەدەراتسيا بيلىگى.
اكتيۆتەرى بۇعاتتالعان تۇلعالاردىڭ بۇعان دەيىن شۆەيتساريا سانكتسيالارىنا ىلىكپەگەنى ناقتىلانعان. سونداي-اق ءباسپاسوز حابارلاماسىندا شۆەيتساريانىڭ «شيەلەنىستى ۋشىقتىرماۋعا، سابىر ساقتاۋعا جانە حالىقارالىق قۇقىقتى، سونىڭ ىشىندە كۇش قولدانۋعا تىيىمدى جانە اۋماقتىق تۇتاستىقتى قۇرمەتتەۋ قاعيداتىن ساقتاۋعا» شاقىراتىنى اتاپ وتىلگەن.
ەسكە سالايىق، بۇعان دەيىن ۆەنەسۋەلا بيلىگىنىڭ اقش-قا «بىرلەسكەن دامۋعا باعىتتالعان» ىنتىماقتاستىقتى ۇسىنعانىن جازعان ەدىك.
