Sátsizdik kez kelgen adamnyń basynan ótedi. Dese de, tosqaýyldarǵa moıymaı, sońyna deıin kúrese bilgen jandar kemde-kem. «Adyrna» ulttyq portaly sátsizdikti sáttilikke aınaldyrǵan tanymal tulǵalardyń oqıǵalaryn nazarlaryńyzǵa usynady.
- Stıven Spılberg - eń tabysty rejısserlerdiń biri. Ol Ońtústik Kalıfornııa ýnıversıtetine túsý úshin úsh ret emtıhan tapsyryp, úsheýinde de «talantsyz» dep baǵalanyp, ótpeı qalǵan. Jas talant sol kezde óz armanynan bas tartqan jaǵdaıda, biz onyń «Shındler tizimi», «Qatardaǵy Raıandy qutqarý» syndy týyndylaryn kóre almaıtyn edik.
- KFC fastfýd jelisiniń negizin qalaýshy Devıd Sanders 65 jasynda jeke bıznesin bastaýǵa sheshim qabyldaǵan. Ol alǵashqy restoranyn ashamyn degenshe taýyq qanattarynyń reebin jasaýda 1009 ret qatelesken eken.
- Brıtandyq ónertapqysh Djeıms Daıson 1993 jyly sańylaýsyz shańsorǵyshty oılap tapqan bolatyn. Ol ónimin naryqqa shyǵarmas buryn 15 jyl boıy zerthanada eńbek etip, shańsorǵyshtyń 5127 prototıpin jasaǵan. «5126 sátsizdiktiń árqaısysy maǵan bir nárse úıretti»,-deıdi ol.
- Tanymal amerıkalyq basketbolshy Maıkl Djordan HH ǵasyrdyń 80-jyldary «bolashaǵynan úmit kúttiretin» 300 oıynshynyń tizimine de kirmegen. Ol dopty kárzeńkege 9000 márte sala almaı, 300-ge jýyq oıynda jeńiliske ushyraǵan. Alaıda, Djordan sátsizdikterge moıymaı, Ulttyq basketbol qaýymdastyǵynyń alty dúrkin chempıony atanyp, óz maqsatyna jete bildi.
- «Men eshqashan jeńilgen emespin. Tek júzege aspaıtyn 10 000 tásildi baıqap kórdim. Tabysqa jetýdiń eń senimdi joly — taǵy bir ret qaıtalap kórý». Bul - elektr shamyn oılap tapqan áıgili ónertapqysh jáne kásipker Tomas Edısonniń sózderi. Ǵalym sátsiz áreketterdiń sany boıynsha rekord ornatty. Ol lampany jetildirý jolynda 10 000 márte synaq jasaǵan.
Al siz maqsatyńyzǵa jetý úshin qansha ret áreket jasadyńyz?
Dıana ASAN,
«Adyrna» ulttyq portaly
