قازاقتىڭ اقيىق اقىنى مۇقاعالي ماقاتاەۆتىڭ تۋعانىنا 90 جىل تولدى. كۇللى عۇمىرىن قازاق ولەڭىنە ارناعان اقداۋىل اقىننىڭ وسىناۋ مەرەيتويىنا ارناپ "قازاقفيلم" ستۋدياسى دا اتسالىسىپ جاتىر، دەپ حابارلايدى "ادىرنا" ۇلتتىق پورتالى.
«قازاقفيلم» كينوستۋدياسىنىڭ facebook.com پاراقشاسىندا جازۋىنشا: "مۇقاعالي ماقاتاەۆتىڭ 90-جىلدىق مەرەيتويى قارساڭىندا، ۇلتىمىزدىڭ اقيىق اقىنىنىڭ اتالعالى وتىرعان بەسىنشى مەرەيتويىن وسى جولى ەرەكشە وتكىزۋگە «قازاقفيلم» كينوستۋدياسى دا ايانباي ات سالىسۋدا. نازارىڭىزعا ۇسىنىلىپ وتىرعان سۋرەتتە كينوتەاترلار اشىلعان كەزدە العاشقى بولىپ كورەرمەنگە جول تارتاتىن، رەجيسسەر بولات قالىمبەتوۆتىڭ «مۇقاعالي» كوركەم ءفيلمىنىڭ ءتۇسىرىلىم بارىسى.
مۇقاعالي دەگەندە ەڭ الدىمەن ويعا ورالاتىن ونىڭ سىرشىل دا نازىك ليريكاسى 50 جىل وتسە دە ەل ەسىنەن ۇمىتىلعان ەمەس. ال ءسىزدىڭ اقىنمەن العاشقى تانىستىعىڭىز قالاي بولدى، ەڭ ءبىرىنشى ويىڭىزعا ورالاتىن ولەڭى قانداي؟", دەپ جازعان.
ەستەرىڭىزگە سالا كەتسەك، ءفيلمنىڭ ءتۇسىرىلىم جۇمىستارى 2019 جىلدىڭ ماۋسىم ايىندا باستالعان. نەگىزگى ەپيزودتار الماتى وبلىسى مەن الماتى، وسكەمەن قالالارىندا جانە سانكت-پەتەربۋرگتە ءتۇسىرىلدى. كارتينا اقىن ءومىرىنىڭ سوڭعى جىلدارىنداعى باستان كەشكەن الۋان تاعدىر جولىن بەينەلەيدى.
1931 جىلى 9 اقپاندا الماتى وبلىسىنا قاراستى قازىرگى رايىمبەك اۋدانىنىڭ قاراساز اۋىلىندا ءومىر ەسىگىن اشقان. 1976 جىلدىڭ 27 ناۋرىزىندا الماتى قالاسىندا ناۋقاستان قايتىس بولعان اقىننىڭ سوڭىندا ولمەس جىرلارى مەن اۋدارمالارى قالدى.
