بۇگىن مۇستافا شوقايدىڭ تۋعان كۇنىنە وراي Shokay.kz سايتى تۋرالى اقپارات جاريالاندى، دەپ حابارلايدى "ادىران" ۇلتتىق پورتالى.
بۇل تۋرالى ارشات وراز جەلىدەگى پاراقشاسىندا جازدى.
بيىل بەلگىلى مەملەكەت جانە قوعام قايراتكەرى مۇستافا شوقايدىڭ تۋعانىنا 135 جىل تولدى. وسىعان وراي، بىرنەشە اي بۇرىن ىسكە قوسىلعان Shokay.kz تاريحي-اعارتۋشىلىق سايتى تۋرالى اقپارات جاريالاندى.
Shokay.kz – مۇستافا شوقايدىڭ ءومىرى مەن مۇراسىن تانىتۋعا ارنالعان كوپتىلدى ونلاين پلاتفورما. سايتتا ونىڭ ءومىربايانى، ەڭبەكتەرى، ماقالالارى، فوتو جانە ۆيدەو ماتەريالدارى جيناقتالعان. پلاتفورما بەس تىلدە قولجەتىمدى. ياعني، قازاق، ورىس، اعىلشىن، تۇرىك جانە فرانتسۋز تىلدەرىندە اقپارات تارايدى.
جوبا اشىلعان العاشقى ايلاردا تۇراقتى اۋديتوريا جيناپ، حالىقارالىق قىزىعۋشىلىققا يە بولدى. ستاتيستيكاعا سايكەس، سايتقا ەڭ كوپ كىرۋشىلەر اقش، ۇلىبريتانيا، اۆستراليا ەلدەرىنەن كەلگەن. بۇل مۇستافا شوقاي تۋرالى اعىلشىن تىلىندەگى ساپالى اقپاراتقا حالىقارالىق سۇرانىستىڭ بار ەكەنىن كورسەتەدى. قولدانۋشىلار سايتقا نەگىزىنەن Google, Yandex جانە ChatGPT ارقىلى كىرەدى، بۇل جوبانىڭ ىزدەۋ جۇيەلەرى مەن جاساندى ينتەللەكت پلاتفورمالارىندا جاقسى يندەكستەلگەنىن كورسەتەدى.
الداعى ۋاقىتتا سايتقا كونتەنتتى كەڭەيتۋ، PDF كىتاپتار ورنالاستىرۋ، الەۋمەتتىك جەلىلەرمەن ينتەگراتسيا جانە حالىقارالىق اۋديتوريامەن جۇمىس جۇرگىزۋ جوسپارلانعان.
سونىمەن قاتار، سايتقا دەمەۋشى بولعىسى كەلەتىن نەمەسە جوبانى تولىقتاي ساتىپ الۋعا قىزىعۋشىلىق تانىتاتىن ازاماتتار مەن ۇيىمدار ىزدەلىپ وتىر.
