ماسكەۋدەگى قىرعىز دياسپوراسىنىڭ توراعاسى، قىرعىزستاننىڭ رەسەيدەگى بۇرىنعى ەلشىسى، رەسەي پرەزيدەنتى جانىنداعى ۇلتارالىق قارىم-قاتىناستار جونىندەگى كوميسسيانىڭ ساراپشىسى رايىمقۇل اتتاكۋروۆ «پراۆدا.رۋ» پورتالىنا بەرگەن سۇحباتىندا قىرعىز رەسپۋبليكاسىنىڭ رەسەيگە قوسىلۋى تالقىلانىپ جاتقانىن ايتقان.
ونىڭ سوزىنشە، قىرعىز رەسپۋبليكاسى سوۆەت كەزىندەگى ەلدەر اراسىندا ورىس تىلىنە مەملەكەتتىك، كونستيتۋتسيالىق مارتەبە بەرىپ وتىرعان جالعىز مەملەكەت ەكەن.
«تاريحي تۇرعىدان الىپ قاراعاندا، رەسەي مەن قىرعىزستانعا بىرىگىپ، بىرگە بولۋ تاعدىرى جازىلعان. تالاي عاسىر بويعى تاريحىمىز ورتاق، بولاشاقتا دا وسىلاي بولا بەرەدى دەپ سەنەمىن. قازىر كوپتەگەن قىرعىزدار رەسەي قۇرامىنا قوسىلۋدى سۇراپ، رەسەي فەدەراتسياسىنا جۇگىنگەلى ءجۇر»، – دەپتى اتتاكۋروۆ.
«قىرعىزستاندا شىنىمەن رەسەيگە قوسىلۋ ماسەلەسى قاراستىرىلىپ جاتىر ما؟» – دەپ ناقتى قويىلعان سۇراققا بۇرىنعى ەلشى نىق سەنىممەن: «ءيا، قىرعىزستاندا مۇنداي اڭگىمە ءجيى ايتىلادى»، – دەپتى. «قىرعىزستاندا دا، وسى ماسكەۋدەگى دياسپورالىق ورتادا دا رەسپۋبليكانىڭ رەسەي قۇرامىنا قوسىلۋ قاجەتتىگى ءجيى كوتەرىلىپ، كوپ تالقىلانادى. ارينە، مۇنى باس سالىپ بىردەن جاساي المايمىز. مەنىڭشە، ۋاقىت وتە كەلە، رەسەيمەن قوسىلۋ باعىتىنا قاراي ءجۇرۋ كەرەك، ءومىردىڭ ءوزى ءبىزدى بىرىگۋگە يتەرمەلەپ وتىر، – دەپ مالىمدەگەن.
بۇگىن قىرعىز رەسپۋبليكاسىنىڭ رەسەيدەگى ەلشىلىگى «پراۆدا.رۋ» باسىلىمىنداعى مالىمدەمەگە جاۋاپ بەردى.
"قىرعىزستان - تاۋەلسىز، ەگەمەندى مەملەكەت جانە حالىقارالىق قوعامداستاستىقتىڭ تولىققاندى مۇشەسى. ورىس ءتىلى قىرعىز رەسپۋبليكاسىنىڭ مەملەكەتتىك ءتىلى ەمەس، رەسمي ءتىلى بولىپ سانالادى.
قىرعىزستان باسشلىعى ەلىمىزدىڭ ەگەمەندىگىن، اۋماقتىق تۇتاستىعىن جانە ۇلتتىق مۇددەلەرىن ساقتاۋ ساياساتىن جۇرگىزىپ جاتىر. سونىمەن قاتار، قىرعىزستان مەن رەسەي قاتىناسى ءوزارا تۇسىنىستىك جاعىنان قارقىندى دامىپ كەلەدى.
ءبىزدىڭ ەلدەردى تاريحىمىز جانە ەۋرازيالىق قۇندىلىقتار بىرىكتىرەدى. قىرعىزستان مەن رەسەي - سەنىمدى سەرىكتەس", - دەلىنگەن رەسمي حابارلامادا.
ەلشىلىك قوعامدىق تارتىپسىزدىك تۋعىزاتىن، مەملەكەت مۇددەسىننە نۇقسان كەلتىرەتىن پىكىرلەردى جاريالاۋدان باس تارتۋعا شاقىرعان.
"ادىرنا" ۇلتتىق پورتالى
فوتو اشىق دەرەككوزدەن الىندى
