گۇلمانات اۋەلحان. بۇيرا-بۇيرا بۇلتقا ءسىڭىپ جوعالدىق

985

كۇز ايى – ساعىنىش ايى، ماحاببات ايى. الابۇرتقان كوڭىلگە، الاسارتقان جۇرەككە نازىك مۇڭ سىيلاپ، جابىرقاعان جانىڭا قۋات بىتىرەر، ەلەگىزگەن كوىڭلگە ساعىنىش سىيلار ءتاتتى مەزگىل.

«ادىرنا» ۇلتتىق پورتالى وسىناۋ سەزىمگە، ساعىنىشقا تولى مەزگىلدە جۇرەكتەرى جىرعا تولعان اقىنداردان توپتاما جىرلارى ۇسىنۋدى قولعا الدى. جاڭا جىر، جاڭا ساعىنىش لەبىن سەزگىڭىز كەلسە، مارحابات! ادەبي ورتادا ءوز داۋىسىمەن تانىمال اقىن قىزىمىز گۇلمانات اۋەلحاننىڭ كۇزگى جاڭا جىرلارى.

 

*   *   *

بولاشاققا بىزدەر سولاي جول الدىق،

اپپاق،  ادال  سەزىمدەردى وبال عىپ.

بۇلدىر-بۇلدىر ەلەستەردى قۋالاپ،

بۇيرا-بۇيرا بۇلتقا ءسىڭىپ جوعالدىق.

 

سەزبەپپىز-اۋ،

كوكتەم عۇمىر وتكەنىن،

كۇتىپ ءجۇرىپ سارالاقاز جەتكەنىن.

بۋاز بۇلتتار قارىندارىن سۇيرەتكەن،

اق جاۋىنعا اينالىپ ءبىر توككەنىن.

 

ءبىزدىڭ سولاي ەكى ايرىلعان جولىمىز،

تاعدىردان عوي، باعىمىز دا سورىمىز.

قولىن بۇلعاپ ءالسىن-ءالسىن شاقىردى،

ساعىنىشقا تولى كۇز...

 

بىزدەر ماڭگى جولىقپايتىن شىعارمىز،

كوڭىلمەن ءبىر تولىقپايتىن شىعارمىز.

ۇمىتتەردىڭ شامى قالعىپ كەۋدە دە،

ءۇنسىز قالىپ تىنارمىز...

 

بۇلا-بۇلا سەزىمدەردى وبال عىپ،

قوبالجىدىق، قورقىنىشقا تونالدىق.

قۇس سەكىلدى قۇبا داۋسىن قۇلاتىپ،

قۇراق-قۇراق بۇلتقا ءسىڭىپ جوعالدىق.

*   *   *

كۇلىمدەپ قاۋاشاق اشاتىن،

جۇپارىن جار سالا شاشاتىن.

گۇلدەردىڭ قىپ-قىسقا تاعدىرى،

قۇشاعىن كوكتەمگە اشاتىن.

 

ءسان قوسىپ دالامنىڭ  كوركىنە،

كۋا بوپ عاشىقتار سەرتىنە.

حوش ءيىس گۇلدەردەن اڭقيتىن،

جانداردىڭ داۋا بوپ دەرتىنە

 

سەكىلدى جولدارىڭ – جولدارىم،

جانىڭنىڭ سەزىنەم توڭعانىن.

كىمنىڭ باعىندا سولمادىڭ،

سۇلۋلىعىڭ ءۇشىن سورلادىڭ...

*   *   *

شەكسىز سەزىم قۇشاعىندا تەربەلدىم،

قيالىمنىڭ الەمىنە سەن كەلدىڭ.

بوزعىلت تۇمان اراسىنان قول بۇلعاپ،

بوز ءۇمىتتىڭ سوڭىنا ەرىپ سەندەلدىم.

 

ماحابباتتىڭ ۇلىلىعىن سەزىندىم،

جانىڭ شەمەن، تۇنىپ تۇرعان كوزىڭ مۇڭ.

دومبىرانىڭ اۋەنىنە ەلىتىپ،

شەرگە تولى كوڭىلىممەن ەزىلدىم.

 

ەبىل-دەبىل اق جاڭبىرداي ەگىلدىم،

جانىمدى جەپ بارا جاتتى جەمىر مۇڭ.

ۇيىقتاپ جاتقان سەزىمىمدى وياتىپ،

كوڭىلىمنىڭ تەرەزەسىن سەن ۇردىڭ...

*   *   *

كوكجيەككە قىزارىپ، ءسىڭىپ كەتتى قاربىز كۇن،

وزەگىمدى ورتەيدى ساعىنىشتاي جالعىز مۇڭ.

كوشىڭدى جولدا قالدىرماس، قاجىرى بەكەم نار قىزبىن،

جانىنا داۋا كىم تابار،

جاتباۋىر بولعان جالعىزدىڭ.

 

ءتۇننىڭ قارا شۋالشاڭ ەتەگىندەي تۇرىلگەن،

ۇكى بولىپ ءتىل قاتام تاڭىرىمە ۋىلمەن.

ءۇمىتىمدى وڭگەرىپ ۇنسىزدىككە جۇتىلام،

سىرىمدى ايتىپ شاعىنىپ، قۇشاقتاسام ىڭىرمەن.

 

ايدىڭ ءسۇيىپ اجارىن، جۇلدىزدارعا تامساندىم،

سۇلۋلىقتى جىر ەتىپ، بار الەمگە جار سالدىم.

جۇرەگىمە جيناپ اپ بار ماحاببات جىلۋدى،

تەبىرەنە تەڭسەلىپ ادەمى ءبىر ءان سالدىم.

 

شولىركەيمىن كەي شاقتار، وي ولكەسىن كەزەمىن،

سىزداپ كەيدە جۇرەگىم ورتەنگەندە وزەگىم.

قارسى جۇزەم اعىسقا، داۋىلدى دا ەلەمەي،

بۋىرقانعان تىرلىكتىڭ كەشىپ ءوتىپ وزەنىن.

 

كوكجيەككە قىزارىپ ءسىڭىپ كەتتى قاربىز كۇن،

وزەگىمدى ورتەيدى ساعىنىشتاي جالعىز مۇڭ،

كوشىڭدى جولدا قالدىرماس، قاجىرى بەكەم نار قىزبىن،

جانىنا داۋا تابا الماي، جاتباۋىر بولعان جالعىزبىن...

كوڭىل

كىمنەندە، نەدەن قالماعان كوڭىل،

ءابجىلان بولىپ ارباعان كوڭىل.

تۇلكى بۇلاڭمەن الداعان كوڭىل،

سوندا دا سەرتتەن تانباعان كوڭىل.

 

اسپانعا ۇشىپ ورلەگەن كوڭىل،

ءۇمىت بوپ مازداپ سونبەگەن كوڭىل.

شىڭىراۋدان دا ولمەگەن كوڭىل،

ىزگىلىك ىزدەپ شولدەگەن كوڭىل.

 

سايقالدارعا ەرىپ ساتىلعان كوڭىل،

قياناتتاردان اھ ۇرعان كوڭىل.

ءوز-ءوزىن مۇڭعا باتىرعان كوڭىل،

شارشاعان كوڭىل، شاتىلعان كوڭىل.

 

شاعالا بولىپ شارق ۇرعان كوڭىل،

اداسقان كوڭىل، القىنعان كوڭىل.

سابىرى كەيدە سارقىلعان كوڭىل،

سىبىزعى بولىپ تارتىلعان كوڭىل.

 

قوبىزداي قوڭىر كۇيگە ەنگەن كوڭىل،

قامىرداي كەيدە يلەنگەن كوڭىل.

جاقسىنى كورىپ جادىرار كوڭىل،

جاماندى كورىپ جيرەنگەن كوڭىل.

 

جابىرقاپ جۇرگەن جالىنسىز كوڭىل،

باعالانبايتىن قادىرسىز كوڭىل.

ارعىماق كوڭىل، اققۋداي كوڭىل،

ورالماس قايتا ساعىم شىن كوڭىل.

 

ءار ساتتەن ءۇنسىز سىر ۇققان كوڭىل،

قىزىلدى كورسە، قۇنىققان كوڭىل.

بەزىنىپ كۇيبەڭ تىرشىلىگىنەن،

جىرمەنەن جاندى جىلىتقان كوڭىل...

 

اۆتور تۋرالى: گۇلمانات اۋەلحان 1980 جىلى قحر-دىڭ تارباعاتاي ايماعى تولى اۋدانىندا دۇنيەگە كەلگەن. 2004 جىلى اتا جۇرتقا ورالعان، «جاس تولقىن»، «قوشتاسقىم كەلمەيدى»، «الاتاۋ جىرلايدى» جىر جيناقتارىنا جانە «قازاق پوەزياسىنىڭ انتولوگياسىنا» ولەڭدەرى ەنگىزىلگەن. رەسپۋبلكالىق بىرنەشە مارتە جىر ءمۇشايرالارىنىڭ جۇلدەگەرى، 2006 جى قاينار ۋنيۆەرسيتەتىندە وتكىزىلگەن رەسپۋبليكالىق جاس اقىندار جىر ءمۇشايراسىنىڭ باس جۇلدەگەرى، 2007 جىلى «ءۇن» جۋرنالى ۇيىمداستىرعان «اقىت ءۇلىمجى جانە ۇلتتىق رۋح» اتتى حالىقارالىق جىر ءمۇشايراسىنىڭ باس جۇلدەگەرى، حالىقارالىق «شابىت» فەستيۆالىنىڭ ديپلومانتى. 2007, 2008, 2009 جىلدارى «قازاق ادەبيەتى»، «جاس قازاق»، «ادەبيەت ايدىنى» گازەتتەرى مەن «جالىن»، «جۇلدىز»، «جامبىل»، «اقجەلكەن»، «ءۇن» جۋرنالدارىنا توپتاما ولەڭدەرى جاريالانىپ، وقىرمان قاۋىمنىڭ جاقسى باعاسىن العان. قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ تۇلەگى. قازاق مەملەكەتتىك قىزار پەداگوگيكالىق ۋنيۆەرسيتەتىنىڭ گازەتىندە، رەسپۋبليكالىق «سىن» جۋرنالىندا قىزمەت اتقارعان. 

 

سۋرەت ينتەرنەت جەلىسىنەن

پىكىرلەر
رەداكتسيا تاڭداۋى