قورعانبەك امانجولدىڭ جەكە پاراقشاسىنان
28 تامىزدا وتاندىق تەلەۆيزيا ارداگەرى، بەلگىلى تەلەجۋرناليست تىلەۋقابىل مىڭجاسار 75 جاسقا قاراعان شاعىندا دۇنيەدەن ءوتتى. وسى قازاعا بايلانىستى ءجۋرناليستىڭ دوسى، اقىن قورعانبەك امانجول ولەڭ ارنادى.
مىڭ جاساعىر
اينالايىن اسىل دوس تىلەۋقابىل،
ازاماتقا قيىن-اۋ جىلاۋ دا ءبىر.
ارعى بەتكە اسىعىس اتتاندىڭ-اۋ،
دوستارىڭنىڭ سابىرىن سىناۋ ما بۇل؟!
وشكەنىنە وزىڭدەي جالىن ەردىڭ،
قابىرعاسى قايىستى قالىڭ ەلدىڭ.
مىڭجاساروۆ جۇرگىزگەن مىڭ رەپورتاج
قازاعىمنىڭ ول دا ءبىر باعى دەرمىن.
ومىردەگى ءوزىڭ ەڭ بايىپتى ۇلان،
تەلەارنادا تەڭدەسسىز سايىپقىران.
ماڭگىلىككە مەزگىلسىز كەتسەڭ-داعى،
قۇشاعىمدى مەن ساعان جايىپ تۇرام.
دوسىم، سەنى ساقتايمىن جۇرەگىمدە،
جەلبىرەتەم تۋىڭدى جىر ەلىندە.
كيە قايدا دەيمىن-اۋ،
كيە سەندە،
قاسيەتتى تۇركىستان تۇلەگىندە.
سەمسەر ەدىڭ، سەرتشىل ەڭ، سەركە دە ەدىڭ،
ەمىن-ەركىن ەلىڭە ەركەلەدىڭ.
جانىڭ سەنىڭ جايىلعان جايىق ەدى،
مارتتىگىڭمەن مايەكتى، كوركەم ەدىڭ.
اينالايىن ايكول دوس تىلەۋقابىل،
باقيدا دا بولعاي-دى دۇعاڭ قابىل.
ماڭگىلىككە پانيدەن قانات قاققان،
ۇقساتامىن ءوزىڭدى قىرانعا ءبىر.
سەڭگىرلەرگە، قىرانىم، شارىقتاي بەر،
سۋدا جۇزگەن، رۋحىڭدى بالىقتاي كور.
جۇرەگىندە ەلىڭنىڭ مىڭ جاساعىر،
قازاعىڭنىڭ كوگىندە قالىقتاي بەر...
قورعانبەك امانجول
28.08.2026
