10 قىركۇيەك — بۇكىلالەمدىك ءسۋيتسيدتىڭ الدىن الۋ كۇنى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، الەمدە ءار 40 سەكۋند سايىن ءبىر ادام ءوز-وزىنە قول جۇمسايدى. ياعني، جىل سايىن 800 مىڭ ادام سۋيتسيدتەن قايتىس بولادى.
ءوز-وزىنە قول سالۋ – الەمدىك قۇبىلىس
«كەز كەلگەن ءولىم - قايعىلى وقيعا. دەسە دە،ءسۋيتسيدتىڭ الدىن الۋعا بولادى. ءبىز بارلىق ەلدەردى بىرىڭعاي باعدارلاما قابىلداۋعا شاقىرامىز. ونى دەنساۋلىق ساقتاۋ جانە ءبىلىم بەرۋ سالالارىنا قوسۋ كەرەك»,-دەيدى ددۇ باس ديرەكتورى تەدروس ادحانوم گەبرەسيەسۋس.
بۇگىندە ددۇ-عا مۇشە 183 ەلدىڭ 38-ىندە عانا ءسۋيتسيدتى الدىن الۋ ءۇشىن قابىلدانعان باعدارلاما بار.
2019 جىلى ەلىمىزدە كۇنىنە ون ادام ءوزىن اجالعا قيعان
قازاقستان ورتالىق ازيا ەلدەرىنىڭ اراسىندا سۋيتسيد بويىنشا ءۇشىنشى ورىندى الادى. قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتى بويىنشا، وتكەن جىلى ەلىمىزدە 3805 ادام ءوز-وزىنە قول سالعان، ونىڭ 180-ءى — كامەلەتكە تولماعاندار. دەمەك، كۇنىنە 10 ادام ءوزىن اجالعا قيعان. سۋيتسيد الماتى، شىعىس قازاقستان جانە تۇركىستان وبلىستارىندا كوپ تىركەلگەن.
ادام ەشكىمگە قاجەتسىز ەكەنىن سەزىنگەن جاعدايدا وزىنە قول جۇمسايدى
«جاسوسپىرىمدەر اراسىندا سۋيتسيد فاكتىلەرى ءجيى تىركەلەدى. سەبەبى، قازىرگى تاڭدا اتا-انالار بالالارىنىڭ تاربيەسىنە دۇرىس كوڭىل بولمەيدى. بارلىعى جۇمىسباستى بولىپ كەتكەن. نەگىزىنەن، ءوزىن-ءوزى ءولتىرۋ – پسيحيكالىق اۋرۋدىڭ ناتيجەسى. ادام ەشكىمگە قاجەتسىز ەكەنىن سەزىنگەن جاعدايدا وزىنە قول جۇمسايدى. قۇرمەتتى اتا-انالار، بالالارىڭىزبەن سىرلاسىڭىزدار، ولاردى قولداپ، مەيىرىم كورسەتىڭىزدەر»,- دەيدى پسيحولوگ ماليكا قاناتقىزى.
جاقىنىمىزعا جاناشىر بولىپ، ونىڭ جان ايقايىن ەستۋگە تىرىسايىق، وقىرمان!
ديانا اسان،
«ادىرنا» ۇلتتىق پورتالى
