10 qyrkúıek — búkilálemdik sýııdtiń aldyn alý kúni. Dúnıejúzilik densaýlyq saqtaý uıymynyń málimetinshe, álemde ár 40 sekýnd saıyn bir adam óz-ózine qol jumsaıdy. Iaǵnı, jyl saıyn 800 myń adam sýııdten qaıtys bolady.
Óz-ózine qol salý – álemdik qubylys
«Kez kelgen ólim - qaıǵyly oqıǵa. Dese de,sýııdtiń aldyn alýǵa bolady. Biz barlyq elderdi biryńǵaı baǵdarlama qabyldaýǵa shaqyramyz. Ony densaýlyq saqtaý jáne bilim berý salalaryna qosý kerek»,-deıdi DDU bas dırektory Tedros Adhanom Gebresıesýs.
Búginde DDU-ǵa múshe 183 eldiń 38-inde ǵana sýııdti aldyn alý úshin qabyldanǵan baǵdarlama bar.
2019 jyly elimizde kúnine on adam ózin ajalǵa qıǵan
Qazaqstan Ortalyq Azııa elderiniń arasynda sýııd boıynsha úshinshi oryndy alady. QR Bas prokýratýrasy quqyqtyq statıstıka jáne arnaıy esepke alý jónindegi komıtetiniń málimeti boıynsha, ótken jyly elimizde 3805 adam óz-ózine qol salǵan, onyń 180-i — kámeletke tolmaǵandar. Demek, kúnine 10 adam ózin ajalǵa qıǵan. Sýııd Almaty, Shyǵys Qazaqstan jáne Túrkistan oblystarynda kóp tirkelgen.
Adam eshkimge qajetsiz ekenin sezingen jaǵdaıda ózine qol jumsaıdy
«Jasóspirimder arasynda sýııd faktileri jıi tirkeledi. Sebebi, qazirgi tańda ata-analar balalarynyń tárbıesine durys kóńil bólmeıdi. Barlyǵy jumysbasty bolyp ketken. Negizinen, ózin-ózi óltirý – psıhıkalyq aýrýdyń nátıjesi. Adam eshkimge qajetsiz ekenin sezingen jaǵdaıda ózine qol jumsaıdy. Qurmetti ata-analar, balalaryńyzben syrlasyńyzdar, olardy qoldap, meıirim kórsetińizder»,- deıdi psıholog Malıka Qanatqyzy.
Jaqynymyzǵa janashyr bolyp, onyń jan aıqaıyn estýge tyrysaıyq, oqyrman!
Dıana ASAN,
«Adyrna» ulttyq portaly
