مۇعالىمگە شىن مارتەبە بەرگىمىز كەلسە مەكتەپتى باسقارۋ جۇيەسىن وزگەرتەتىن كەز كەلدى. ول ءۇشىن ەڭ الدىمەن مەكتەپتەگى باستى تۇلعا ءبىلىم بەرۋشى - مۇعالىم بولۋ كەرەك! ول ءۇشىن ديرەكتور، زاۆۋچ دەگەن اكىمشىل-ءامىرشىل باسقارۋشىلىق جۇيەنى ۇيىمداستىرۋشى-مەنەدجەرلىك جۇيەگە وزگەرتكەن ءجون.
1) وقۋ مەنەدجەرى - قازىرگى تىلدە وقۋ ءىسى ورىنباسارى;
2) تاربيە مەنەدجەرى - قازىرگى تىلدە تاربيە جونىندەگى ورىنباسارى;
3) باس مەنەدجەر - قازىرگى تىلدە ديرەكتور.
بۇل قىزمەتتەردىڭ اتىمەن قوسا زاتى وزگەرۋ قاجەت. وقۋ مەنەدجەرى دەگەنىمىز "جوسپارىڭ قايدا؟! تەز اكەل، قول قويام!", ء"اي قايداسىڭ، ساباعىڭدا نەگە وتىرمايسىڭ؟!", دەگەن اكىرەڭدەگەن ايقايشى ەمەس! مۇعالىمگە بالا وقىتۋعا جاعداي جاساۋشى، جاقسى ءبىلىم بەرۋگە، ۋاقىتىندا كەلۋگە نە جەتپەي جاتقانىن زەرتتەۋشى مەنەدجەر بولۋ كەرەك.
تاربيە مەنەدجەرى: ء"بىلىم كۇنىنە وتكىزگەن ساباقتارىڭنىڭ فوتووتچەتىن نەگە تاپسىرماعانسىڭدار؟! تىلدەر كۇنىنە نەگە ساباق جوسپارىن بەكىتپەگەنسىڭدەر؟! 1 ساعات ۋاقىت بەرەم" دەپ بىتپەيتىن جوسپار، ەسەپ سۇراۋشى ەمەس، كەرسىنشە وسىنى ءوزى ۇيىمداستىرۋشى مەنەدجەر بولۋ كەرەك.
باس مەنەدجەردىڭ قىزمەتى ءبىلىم بەرۋشى (مۇعالىم) مەن ءبىلىم الۋشىنىڭ (وقۋشى) جاعدايىن جاساۋعا باعىتتالۋ كەرەك. باس مەنەدجەر جاڭا زامانعا ساي، جاڭا تەحنولوگيالار ءتىلىن جەتىك مەڭگەرگەن، مۇعالىمدەرگە وقىتۋدىڭ ءتۇرلى ءادىس-تاسىلدەرى بويىنشا كەڭەس بەرەتىن، بىلايشا ايتقاندا ماستەركلاسس وتكىزەتىن مامان بولعانى ءجون.
قىسقاسى ءبىلىم بەرۋدى ۇيىمداستىرۋدى تۇبەگەيلى وزگەرتىپ، مۇعالىم ءوزىن بىرەۋدىڭ قول استىنداعى جۇمىسشى سەزىمىنەن ارىلىپ، تۇلعالىق قاسيەتى قالىپتاسپاي، مارتەبەسىنىڭ بيىكتەۋىنە زاڭ دا، باسقا دا كومەكتەسە المايدى.
مەن قازاقتىڭ بالاسى
