اقمولا وبلىسىنىڭ پروكۋرورلارى اتباسار اۋدانى اكىمدىگىنىڭ قۇرىلىس ءبولىمى باسشىلارىنا، «پرەستيج ستروي 7» جشس مەن «فۋندامەنتال» ۇيىمدارىنىڭ وكىلدەرىنە قاتىستى 300 ملن تەڭگەدەن استام قاراجاتتى جىمقىرۋ فاكتىسى بويىنشا تەرگەۋدى اياقتادى، دەپ حابارلايدى "ادىرنا" ۇلتتىق پورتالى.
وڭىرلىك پروكۋراتۋرانىڭ مالىمەتىنشە، بۇل قاراجات 2021 جىلى ۇكىمەت رەزەرۆىنەن بولىنگەن. ولار اتباسار اۋدانىنداعى سۋ تاسقىنى قاۋپى بار ايماقتا تۇراتىن 200 وتباسىنى كوشىرۋ ءۇشىن ەكى 100 پاتەرلىك تۇرعىن ءۇي سالۋعا ارنالعان ەدى.
كۇدىكتىلەردىڭ ارەكەتتەرى قىلمىستىق كودەكستىڭ 189-بابىنىڭ 4-بولىگى بويىنشا، ياعني اسا ءىرى مولشەردەگى مۇلىكتى تالان-تاراجعا سالۋ بابى بويىنشا سارالانعان. اتالعان باپ 12 جىلعا دەيىن باس بوستاندىعىنان ايىرۋ جانە مۇلىكتى تاركىلەۋ جازاسىن قاراستىرادى.
سوت سانكتسياسىمەن ەكى كۇدىكتى قاماۋعا الىندى، ال ءۇشىنشى قاتىسۋشى ۇيقاماققا جىبەرىلدى.
«تەرگەۋ بارىسىندا قىلمىستىق جولمەن تابىلعان مۇلىكتەر انىقتالدى. ولاردىڭ قاتارىندا استانا مەن الماتىداعى كوممەرتسيالىق جىلجىمايتىن مۇلىك، ارنايى تەحنيكا، قۇرىلىس جابدىقتارى جانە بانكتىك شوتتارداعى 50 ملن تەڭگەدەن استام قاراجات بار. بارلىق تاركىلەنگەن مۇلىكتىڭ جالپى باعالاۋ قۇنى 335 ملن تەڭگەدەن استى»، – دەپ حابارلادى پروكۋراتۋرا.
سونداي-اق پروكۋرورلاردىڭ مالىمەتىنشە، وسى مۇلىكتىڭ ءبىر بولىگى جالعا بەرىلىپ، زاڭسىز تابىس اكەلگەن.
«وسىعان بايلانىستى ءبىر كۇدىكتىنىڭ ارەكەتى قوسىمشا قىلمىستىق كودەكستىڭ 218-بابىنىڭ 3-بولىگى بويىنشا، ياعني قىلمىستىق جولمەن الىنعان اقشا مەن باسقا دا مۇلىكتى زاڭداستىرۋ رەتىندە سارالاندى. بۇل باپ بويىنشا 10 جىلعا دەيىن باس بوستاندىعىنان ايىرۋ جانە مۇلىكتى تاركىلەۋ جازاسى كوزدەلگەن»، – دەپ تولىقتىردى قاداعالاۋ ورگانى.
