بۇگىن رەسەي فەدەراتسياسىنىڭ پرەزيدەنتى ۆلاديمير پۋتين قازاقستان رەسپۋبليكاسىنا مەملەكەتتىك ساپارمەن كەلەدى. ساپار اياسىندا ونىڭ ماقالاسى ەلىمىزدىڭ بەدەلدى باسىلىمى – «كازاحستانسكايا پراۆدا» گازەتىندە جاريالاندى، وندا رەسەي باسشىسى ەكى ەل اراسىنداعى سەرىكتەستىك تۋرالى ءوز ويلارىن ءبولىستى، دەپ حابارلايدى "ادىرنا" ۇلتتىق پورتالى.
ماقالادا ۆلاديمير پۋتين رەسەي مەن قازاقستاننىڭ دوستىق، تاتۋ كورشىلىك جانە ءوزارا كومەك داستۇرلەرىنە سۇيەنگەن سەرىكتەستىگى بارلىق سالادا بەلسەندى دامىپ كەلە جاتقانىن اتاپ ءوتتى. ول ەكى ەلدىڭ قارىم-قاتىناسى تەڭدىك، مۇددەنى قۇرمەتتەۋ جانە ناقتى ناتيجەگە باعىتتالعان جۇمىستار ارقىلى نىعايعانىن ايتتى.
ونىڭ ايتۋىنشا رەسەي — قازاقستاننىڭ ءىرى ەكونوميكالىق سەرىكتەستەرىنىڭ ءبىرى.
«قازاقستان ەكونوميكاسىنا تارتىلعان رەسەي ينۆەستيتسياسى دا جىلدان-جىلعا ءوسىپ جاتىر. بۇگىندە ونىڭ كولەمى شامامەن 13 ميلليارد دوللارعا جەتتى. قازاقستاندا رەسەيلىك ىسكەر توپتاردىڭ قاتىسۋىمەن 23 مىڭنان استام كاسىپورىن جۇمىس ىستەيدى. ەكى ەلدىڭ كومپانيالارى ونەركاسىپتىك كووپەراتسيا مەن جوعارى تەحنولوگيالار سالاسىندا بىرقاتار بىرلەسكەن ءىرى جوبالاردى ىسكە اسىرىپ وتىر. سونىڭ ارقاسىندا ەكونوميكانى كەشەندى جاڭعىرتىپ، قوس مەملەكەتتىڭ تەحنولوگيالىق ەگەمەندىگىن نىعايتۋعا ىقپال ەتەتىن تولىق يندۋستريالىق تسيكلدىڭ جاڭا وندىرىستەرى جولعا قويىلىپ جاتىر»، — دەيدى رف پرەزيدەنتى.
سونداي-اق، رەسەي مەن قازاقستان اراسىندا گۋمانيتارلىق بايلانىستار ادەتتەگىدەي ماڭىزدى ورىن الاتىنىن دا اتاپ ءوتتى. ەكى تاراپ تا مادەنيەت، سپورت، قوعامدىق جانە جاستار اراسىندا جانە ءبىلىم بەرۋ سالاسىندا ىنتىماقتاستىقتى كەڭەيتۋ ءۇشىن كوپتەگەن جۇمىس اتقارۋدا. رەسەيدىڭ جوعارى وقۋ ورىندارىندا شامامەن 60 مىڭ قازاقستاندىق ستۋدەنت وقىپ ءجۇر.
قازاقستاندا لومونوسوۆ اتىنداعى ممۋ سەكىلدى جەتەكشى رەسەيلىك ۋنيۆەرسيتەتتەردىڭ فيليالدارى تابىستى جۇمىس ىستەپ تۇر. جاقىندا استانادا رەسەي سىرتقى ىستەر مينيسترلىگىنىڭ ماسكەۋ مەملەكەتتىك حالىقارالىق قاتىناستار ينستيتۋتىنىڭ (مگيمو) فيليالى دا اشىلماق، ونىڭ تۇلەكتەرى اراسىندا تانىمال قازاقستاندىقتار، سونىڭ ىشىندە قاسىم-جومارت كەمەلۇلى توقاەۆ تا بار. رەسەي قازاقستاندا جاڭا ءورىستىلدى مەكتەپتەر سالۋدى جانە مەكتەپتەگى ورىس تىلىندە ءبىلىم بەرۋ ساپاسىن ارتتىرۋدى قولدايدى. جۋىردا قىزىلوردا، تاراز جانە تۇركىستان قالالارىندا تاعى وسىنداي ءۇش مەكتەپتىڭ اشىلۋى كۇتىلۋدە. ارينە، ءبىز قازاقستان رەسپۋبليكاسىنىڭ باسشىلىعىنا، اسىرەسە قاسىم-جومارت كەمەلۇلىنا ورىس تىلىنە ەرەكشە قاراعانى ءۇشىن، ونى مەملەكەتارالىق جانە ۇلتارالىق قاتىناس قۇرالى رەتىندە ىلگەرىلەتۋگە باعىتتالعان حالىقارالىق ورىس ءتىلى ۇيىمىن قۇرۋ تۋرالى ماڭىزدى باستاماسى ءۇشىن العىس بىلدىرەمىز»، — دەدى پۋتين.
رەسەي پرەزيدەنتى كەلەسى جىلى قوس مەملەكەت ەكىنشى دۇنيەجۇزىلىك سوعىستاعى جەڭىستىڭ 80 جىلدىعىن اتاپ وتەتىنىن تىلگە تيەك ەتتى. وسى رەتتە ۆلاديمير پۋتين قاسىم-جومارت توقاەۆتى 9 مامىردا ماسكەۋدە وتەتىن اۋقىمدى ءىس-شاراعا شاقىردى.
قازاقستان مەن رەسەي ايماقتىق جانە جاھاندىق ماسەلەلەردە بىرلەسىپ ارەكەت ەتەدى. ەكى ەل تمد جانە شىۇ اياسىندا بەلسەندى ىنتىماقتاستىق جاساپ، حالىقارالىق قاۋىپسىزدىك پەن تۇراقتىلىقتى قامتاماسىز ەتۋدە ۇقساس ۇستانىمداردى ۇستاناتىنىن دا العا تارتتى.
رەسەي باسشىسى قازاقستان پرەزيدەنتى قاسىم-جومارت توقاەۆپەن ءاردايىم تىعىز بايلانىستا جۇمىس ىستەپ، جاڭا باستامالاردى تالقىلايتىنىن جانە ەكى ەل اراسىنداعى ستراتەگيالىق سەرىكتەستىكتى ودان ءارى دامىتۋعا دايىن ەكەنىن جەتكىزدى.
