تۇرىكمەنستان حالىق ءماسليحاتىنىڭ توراعاسى گۋربانگۋلى بەردىمۇحامەدوۆ ارىپتەستەرىمەن، بالالارعا ارنالعان قايىرىمدىلىق قورىنىڭ وكىلىمەن جانە رەسپۋبليكانىڭ عىلىم اكادەمياسىنىڭ باسشىسىمەن وتكەن كەزدەسۋدە جاڭا كىتابىن تانىستىردى، دەپ حابارلايدى "ادىرنا" ۇلتتىق پورتالى «تۋركمەنيستان سەگودنيا» اقپارات اگەنتتىگىنە سىلتەمە جاساپ.
بۇرىنعى پرەزيدەنتتىڭ ايتۋىنشا، بۇل كىتاپتى ول ەڭبەك دەمالىسىندا جازعان.
گۋربانگۋلى بەردىمۇحامەدوۆ ءداستۇر بويىنشا ەڭبەك دەمالىسىن شىعارماشىلىق جۇمىسقا ارناعانىن، ەلدىڭ داڭقتى تاريحى تۋرالى كوپتەگەن ويلارىن قاعاز بەتىنە تۇسىرگەنىن اتاپ ءوتتى.
ناتيجەسىندە Hakyda göwheri («اقىل-وي مارجانى») اتتى جاڭا كىتاپ جارىق كوردى. بۇل ەڭبەكتە ماحتۋمقۇلى فراگي شىعارمالارىنىڭ جالپىادامزاتتىق قۇندىلىقتارعا اسەرى، سونداي-اق ونىڭ ۇلتتىق مادەنيەت پەن الەمدىك وركەنيەتكە قوسقان ۇلەسى تۋرالى ماتەريالدار قامتىلعان.
«قاي كەزەڭدى الىپ قاراساق تا، تۇرىكمەن مادەنيەتى ءاردايىم ەرەكشە قۇندىلىقتارىمەن تانىلىپ، ادامزات تاريحىنا ۇلكەن اسەر ەتكەنىن بايقاۋعا بولادى»، – دەپ اتاپ ءوتتى اركاداگ.
سونداي-اق، ساياساتكەر تۇركى مادەنيەتى حالىقارالىق ۇيىمىنىڭ (تۇركسوي) شەشىمىمەن 2024 جىل ۇلى اقىن ءارى ويشىل ماحتۋمقۇلى فراگي جىلى دەپ جاريالانىپ، اناۋ قالاسى تۇركى الەمىنىڭ مادەني استاناسى بولىپ تانىلعانىن ەسكە سالدى. بۇل تۇرىكمەن حالقى ءۇشىن زور ماقتانىش ەكەنىن بەردىمۇحامەدوۆ اتاپ ءوتتى.
حالىق كەڭەسىنىڭ توراعاسى جاڭا كىتاپتىڭ العاشقى داناسىن ءوز ارىپتەستەرىنە ۇسىندى. ول بۇل كىتاپتىڭ جاقىن كۇندەرى باسىلىپ، كوپشىلىككە قولجەتىمدى بولاتىنىن ايتتى. كەڭەسكە قاتىسۋشىلار اۆتوردى جاڭا شىعارماشىلىق جەتىستىگىمەن قۇتتىقتاپ، اركاداگتىڭ كىتاپتارى تەك تۇرىكمەن حالقى ءۇشىن عانا ەمەس، بۇكىل الەم وقىرماندارىنا قۇندى نۇسقاۋلىق ءارى وقۋلىق بولاتىنىن اتاپ ءوتتى.
مەملەكەتتىك باق گۋربانگۋلى بەردىمۇحامەدوۆتىڭ تۇرىكمەنستان پرەزيدەنتى سەردار بەردىمۇحامەدوۆكە جازعان اشىق حاتىن دا جاريالادى. بۇل حاتتا اۆتور جاڭا ەڭبەگىنىڭ العاشقى داناسىن ماحتۋمقۇلى فراگي شىعارماشىلىعىنا ارناعانىن ايتىپ، ونى مەملەكەت باسشىسىنا سىيلىق رەتىندە قابىلداۋدى سۇراعان.
«وسى مۇمكىندىكتى پايدالانىپ، Hakyda göwheri اتتى جاڭا كىتابىمدى جولداي وتىرىپ، سىزگە زور دەنساۋلىق، ۇزاق عۇمىر جانە ابىرويلى قىزمەتىڭىزدە تەك ساتتىلىك تىلەيمىن»، – دەپ جازدى اركاداگ ۇلىنا.
گۋربانگۋلى بەردىمۇحامەدوۆتىڭ دەمالىسى 1-25 قاراشا ارالىعىندا ءوتتى. وسىلايشا، ول شامامەن ءبىر ايدىڭ ىشىندە جاڭا ەڭبەگىن جازىپ ۇلگەردى. بۇل كىتاپ ساياساتكەردىڭ بيبليوگرافياسىنداعى 61-ءشى ەڭبەك بولىپ وتىر.
