ەلىمىزدەگى شەكتەۋ شارالارى كاسىپكەرلەردى تابىسىنان ايىرىپ، ساۋداسىنا كەرى اسەرىن تيگىزۋدە.
جىلدا 1 قىركۇيەك العاشقى قوڭىراۋ كۇنى گۇل ساتۋشىلاردىڭ ساۋداسى قىزا تۇسەتىن. بيىلعى جىلى قوڭىراۋ سوعىلماي گۇل ساتىلىمىادەتتەگىدەي تابىس اكەلمەدى. وقۋ جىلىنىڭ العاشقى كۇندەرى گۇل باعاسىنىڭ شارىقتاپ كەتەتىندىگى بارىمىزگە ءمالىم. بىراق، گۇل ساتۋشىلارى وسى جىلى ەلىمىزدەگى شەكتەۋلەرگە بايلانىستى گۇلدىڭ باعاسىن اسا قىمباتتاتپاعانىمەن, گۇل ىزدەپ كەلگەن اتا-انا مەن وقۋشىلاردىڭ توبەسى كورىنبەدى.
جاڭا وقۋ جىلى باستالاردا بازارلار مەن ساۋدا-ورتالىقتارىندا ينە شانشىر جەر بولمايتىن. ساباقتار ونلاين رەجيمىندە ءوتىلەتىندىكتەن وقۋشىلار تالاپقا ساي مەكتەپ فورماسىن ىزدەپ باستارىن اۋىرتپادى. جاڭا وقۋ جىلىنىڭ مەكتەپ فورماسىن تالاپ ەتپەيتىندىگى، ساۋداگەرلەردىڭ ساۋداسىن توقتاتتى.
كەڭسە تاۋارلارىنا دا سۇرانىس بۇرىنعىداي ەمەس. مۇعالىم داپتەءردى قولىنا ۇستاپ تەكسەرمەگەندىكتەن كەي اتا-انالار بالالارىنا جاڭا داپتەر الىپ بەرمەي، ەسكى داپتەرلەرىنە جازعىزىپ، اقشا ۇنەمدەۋدىڭ جولىن تاۋىپ وتىر ەكەن. ەسكى قالامىمىزبەن داپتەردىڭ الدى-ارتىن اينالدىرىپ جازا بەرەمىز دەگەن وقۋشىلار مەن ستۋدەنتتەر جاڭا وقۋ جىلىندا جاڭا داپتەر مەن كەڭسە تاۋارلارىنا اسا مۇقتاج ەمەستىگىن ايتتى.
توسىن سىيعا تولى بولىپ باستالعان جاڭا وقۋ جىلى كاسىپكەرلەر تابىسىنان قاعىلىپ، ساۋدالارى توقتاپ جاپا شەگىپ جاتىر. ساباق ۋاقىتى بىتكەندە وقۋشىلار ءتاتتى الۋ ءۇشىن دۇكەنگە باس سۇعىپ، دۇكەننىڭ دە ساۋداسىن قىزدىرتا تۇسەتىن. ال قازىر ەلىمىزدەگى شەكتەۋ شارالارى ساۋدانىڭ سيقىن كەتءىرىپ تۇر. ساتۋشىلار مەن كاسىپكەرلەر ءبارى وڭالىپ، ساۋدالارى قايتا ءجۇرەتىن كەزءدى اسىعا كۇتۋدە.
لاۋرا تۇرسىنجان،
“ادىرنا” ۇلتتىق پورتالى
