قازاقستاندا ەلەكتروندى قىزمەت كورسەتۋ تۇرلەرى كۇن وتكەن سايىن قارقىندى دامىپ كەلەدى. بيىلعى كارانتيندىك جاعداي دا قىزمەت كورسەتۋدىڭ بۇل ءتۇرىنىڭ العا قاراي جۇرۋىنە كوپ ىقپالىن تيگىزگەنى انىق. وسى جىلدىڭ كوكتەمىندە ەلىمىزدەگى ەلەكتروندى قىزمەت كورسەتۋ تۇرلەرى دامىپ قانا قويماي، حالىقتىڭ دا جاڭا زامانعا لايىقتى بولۋىنا تۇرتكى بولعانى ايان.
ماسەلەن، ەڭ الدىمەن ءبىلىم سالاسىن قاشىقتان وقىتۋ جۇيەسىنە كوشىرۋ ءۇشىن اتا انا مەن وقۋشىعا كومپيۋتەرلىك ءبىلىمنىڭ قانشالىقتى ەكەنىن ناقتى كورسەتتى. وسىعان دەيىن قولىنداعى تەلەفونىن تەك بايلانىس قۇرالى ساناپ كەلگەن ادامدار سول تەلەفونمەن قانشاما جۇمىستى تىندىراتىندارىنا دا كوز جەتكىزدى. وسىلاردىڭ قاتارىندا ەلەكتروندى قىزمەت كورسەتۋ دە بار.
بالاسىنىڭ ءبىلىم الۋىن قاداعالاۋدى ماقسات ەتكەن اتا انا ءتۇرلى ۆيدەو كونفەرەنتسيالارعا قاتىسۋدى، ۇستازدارمەن ونلاين بايلانىس ورناتۋدى ۇيرەندى. ءسال كەيىنىرەك ۇكىمەت كارانتيندە وتىرعان حالىققا الەۋمەتتىك كومەك رەتىندە 42500 تەڭگە كولەمىندە جاردەماقى تاعايىندادى. مىنە، ءدال وسى جاردەماقى ميلليونداعان ازاماتتى ەلەكتروندى قىزمەت كورسەتۋ تۇرلەرىمەن تانىستىردى.
نەگىزىنەن ەلەكتروندى قىزمەت تۇرلەرى بۇعان دەيىن دە كەڭىنەن قولدانىستا بولعانىنا قاراماستان، قازاقستاندىقتار كوبىنەسە حالىققا قىزمەت كورسەتۋ ورتالىعىنا ارنايى بارىپ، سول جەردەن قاعاز قۇجاتتاردى الۋدى قۇپ كورەتىن. الايدا پاندەميا كەزىندە جاعداي كۇرت وزگەردى. ازاماتتار ۇيدەن شىقپاي، وزىنە قاجەتتى قۇجاتتاردى ەلەكتروندى تۇردە الىپ، جونەلتۋگە كوشتى.
جوعارىدا ءسوز ەتكەن 42500 تەڭگە جاردەماقىعا قۇجاتىن تاپسىرۋ ءۇشىن تەلەگرام كانالدارىنان باستاپ، ەلەكتروندى ۇكىمەتتى پايدالانۋدى مەڭگەردى. سۇرانىس پەن قاجەتتىلىك ارتقان كەزدە كەز كەلگەن جاعدايدىڭ جۇزەگە اساتىنىن وسى كەزدە دە كوز جەتكىزدىك. ال قازىرگى كەزدە ۇيدە وتىرىپ، جۇمىسسىز رەتىندە تىركەلىپ قانا قويماي، بەلگىلى ءبىر ماماندىق بويىنشا جولدامانى دا ەلەكتروندى نۇسقادا الۋعا مۇمكىندىك بار.
«توتەنشە جاعداي الىنىپ، تەك كارانتين قويىلعاندا، قر ەڭبەك جانە حالىقتى الەۋمەتتىك قورعاۋ مينيسترلىگى جۇمىسسىز ازاماتتارعا ارنالعان ءتۇرلى جۇمىس ورىندارى اشىلعانىن جانە ول ءۇشىن جۇمىسسىز رەتىندە تىركەلۋ قاجەتىن حابارلاعان بولاتىن. مىنە، وسىعان بايلانىستى جۇمىس ىزدەپ، الماتىداعى جۇمىسپەن قامتۋ ورتالىعىنا باردىم. وكىنىشكە قاراي، مەن سياقتى جۇمىس ىزدەگەن ادام وتە كوپ ەكەن.
ۇزىن سونار كەزەككە تۇرىپ، اقىرىندا جۇمىسسىز رەتىندە ورتالىقتا تىركەلۋگە قول جەتكىزبەگەن كۇيى ۇيگە قايتقانمىن. الايدا ارادا كوپ ۋاقىت وتپەستەن، مينيسترلىك تاراپىنان جۇمىسسىز رەتىندە تىركەلۋ دە، جۇمىسقا جولداما الۋ دا ونلاين جۇزەگە اسىرىلاتىنى حابارلانعاندا، قاتتى قۋاندىم. E-gov ارقىلى ۇيدە وتىرىپ، ستاتۋسىڭىزدى جۇمىس ىزدەۋشى ەتىپ وزگەرتۋ ارقىلى قالاعان جۇمىسىڭىزدى ىزدەپ تاۋىپ، جولداما الا الاسىز ەندى. بۇل رەتتە ەلەكتروندى ۇكىمەتتى دامىتۋدا ايانباي قىزمەت ەتكەندەرگە العىس ايتۋ ارتىق بولماس. بۇل كۇندە تۇراقتى جالاقىسى بار جۇمىسقا ورنالاسىپ، وتباسىمدى اسىراپ ءجۇرمىن»، دەيدى اسقار قۇرمانبەك ءوزىنىڭ پىكىرىندە.
ال ۋنيۆەرسيتەتتىڭ ءۇشىنشى كۋرسىندا وقيتىن ۇلجان بەكەمبايقىزى: «اقىلى بولىمدە وقيتىن بولعان سوڭ، وقۋ اقىسىن تولەۋگە اتا اناما جاردەم ەتكىم كەلدى. ونىڭ ۇستىنە وزدەرىڭىز بىلەسىزدەر، قازىر كارانتينگە بايلانىستى كوپتەگەن جۇمىس ورىندارى جابىلدى. اكەم جۇمىسسىز قالدى. سودان نە كەرەك، اكەم ەكەۋمىز ەلەكتروندى كىلتتى قولعا الىپ، جۇمىس ىزدەۋشى رەتىندە تىركەلمەككە وتىردىق. E-gov سايتىنا كىرىپ، ونلاين قىزمەت كورسەتۋدى تاڭداپ، ول جەردەن قر ەڭبەك جانە حالىقتى الەۋمەتتىك قورعاۋ مينيسترلىگى تاراپىنان كورسەتىلەتىن قىزمەتتەر قاتارىنان جۇمىس ىزدەۋشى رەتىندە تىركەلۋ بولىمىنە وتتىك. وسى بولىمدە «جۇمىس ىزدەۋشى» بولىپ تىركەلگەن سوڭ، ءوزىمىز ىستەي الاتىن جۇمىستاردى «enbek.kz» سايتىنان ەرىنبەي قاراپ شىقتىق.
اكەم قوعامدىق كولىك جۇرگىزۋشىسى جۇمىسىن، ال مەن الەۋمەتتىك قىزمەتكەر جۇمىسىن تاڭدادىق. ءسويتىپ، وسى جۇمىستارعا جولداما الۋ ءۇشىن «ونلاين قىزمەت كورسەتۋ» تەتىگىن باسىپ، تاڭداۋ جاسادىق. اينالاسى بىرەر ساعاتتا اكەم دە، مەن دە جۇمىسقا قول جەتكىزدىك. ەلىمىزدەگى ەلەكتروندى ۇكىمەتتىڭ بۇلاي قارقىندى دامۋى ءبىزدى قاتتى قۋانتتى. قازىر كەز كەلگەن قىزمەت ءتۇرىن ەلەكتروندى تۇردە الۋعا بولاتىنىن دوستارىم مەن تانىستارىما ەرىنبەي ءتۇسىندىرىپ، ۇيرەتىپ تە ءجۇرمىن»، دەيدى.
تاياۋدا عانا الەۋمەتتىك قىزمەتكەرلەردىڭ ءىىى ونلاين-فورۋمى بارىسىندا زامان تالابىنا ساي الەۋمەتتىك جۇمىس تاسىلدەرى تالقىلاندى. وسىفورۋمدا الەۋمەتتىك قىزمەتكەرلەردىڭ كسىبي ءبىلىمىن ارتتىرۋ ماسەلەسى دە ءسوز بولدى.
شاراعا 500-گە جۋىق ادام، ونىڭ ىشىندە قازاقستاننىڭ الەۋمەتتىك قىزمەتكەرلەرى، حالىقارالىق ۇيىمداردىڭ، ۇكىمەتتىك ەمەس سەكتوردىڭ جانە مەملەكەتتىك ورگانداردىڭ وكىلدەرى قاتىستى. سونداي-اق رەسەي، اقش، يزرايل، بولگاريا، گرۋزيا جانە قىرعىزستاننان كەلگەن ساراپشىلار بايانداما جاسادى.فورۋم بارىسىندا حالىققا الەۋمەتتىك كومەك كورسەتۋ ساپاسىن ارتتىرۋ ماسەلەلەرى دە قارالدى.
الەۋمەتتىك جۇمىس جونىندەگى ۇلتتىق رەسۋرستىق ورتالىقتىڭ ديرەكتورى ليرا رايسوۆا، ارنايى الەۋمەتتىك قىزمەتتەر مەن ااك كورسەتۋ ساپاسىن جاقسارتۋ ماقساتىندا الەۋمەتتىك قىزمەتكەرلەردى تەستىلەۋ جۇيەسىمەن تانىستىردى.
ونىڭ ايتۋىنشا، شەكتى ۇپاي جيناي الماعان الەۋمەتتىك قىزمەتكەر قوسىمشا وقۋدان وتەدى، ال تومەن ۇپاي جۇمىستان شىعارۋعا نەگىز بولمايدى. تەستىلەۋ قازاقستان رەسپۋبليكاسىنىڭ زاڭناماسى مەن الەۋمەتتىك جۇمىس ادەبى تۋرالى سۇراقتاردان، سونىمەن قاتار تاجىريبەلىك تاپسىرمالاردان تۇرادى.
قىزمەتكەردىڭ تولىق بەينەسىن قالىپتاستىرۋ ءۇشىن تەستىلەۋگە انكەتا مەن جەكە سيپاتتامالارىن، كوممۋنيكاتيۆتى قۇزىرەتتىلىگىن جانە ەموتسيونالدى كۇيزەلىس دەڭگەيىن انىقتاۋعا باعىتتالعان پسيحولوگيالىق تەست كىرەدى. قىزمەتكەرلەردى وقىتۋ Zoom, Youtube, Citiesoflearning.eu بازالارىندا ونلاين-رەجيمدە وتەتىندىگىن اتاپ وتكەن ءجون.
«ادىرنا» ۇلتتىق پورتالى.
