Microsoft كومپانياسىنىڭ نەگىزىن قالاۋشى بيلل گەيتس سالدارى كوروناۆيرۋستىق پاندەميادان دا قاۋىپتى ەكولوگيالىق اپات بولادى دەپ بولجادى.
ول الداعى ونجىلدىقتا الەمدى جاھاندىق ەكولوگيالىق داعدارىس شايقايتىنىن اتاپ ءوتتى.كاسىپكەر اپاتتىڭ الدىن الۋ ءۇشىن كومىرتەگى شىعارىندىلارىن تۇبەگەيلى ازايتۋدى ۇسىندى.
- ايتپەسە، قورشاعان ورتانىڭ ناشارلاۋى، ادامداردىڭ قايتىس بولۋى جانە ەكونوميكالىق پروبلەمالار پاندەميا كەزىندەگىگە قاراعاندا الدەقايدا كوپ بولادى.ەگەر كليماتتىڭ لاستانۋىن قازىردەن باستاپتوقتاتپاساق، ەرتەڭگى كۇنى ۇيدەن شىعۋعا قورقاتىن جاعدايعا جەتەمىز.
وتكەن اپتاداعى مالىمەتتەر بويىنشا، بۇكىل الەمدە COVID-19-دان 600 000-نان استام ادام قايتىس بولدى. جىل سايىن بۇل 100 000 ادامعا شاققاندا 14 ءولىم كورسەتكىشى. وسى قارقىنمەن جالعاسا بەرسە، عاسىردىڭ اياعىندا بۇل كورسەتكىش 100 000 ادامعا شاققاندا 73 ءولىمدى قۇراۋى مۇمكىن.باسقاشا ايتقاندا، 2060 جىلعا قاراي كليماتتىڭ وزگەرۋى COVID-19 سياقتى قاۋىپتى بولادى، ال 2100 جىلعا قاراي ول بەس ەسە قاۋىپتى بولۋى مۇمكىن.
گەيتس كوروناۆيرۋستىڭ كەلەتىنىن وسىدان 5 جىل بۇرىن ايتقان
2015 جىلى بيلل گەيتس TED Talk جوباسىندا ەبولا تۋرالى لەكتسيا وقىعان بولاتىن. ول بايانداماسىندا ەبولاعا قاراعاندا الدەقايدا قاۋىپتى، كوپ ادامنىڭ ءومىرىن جالمايتىن جاڭا ىندەت كەلەدى دەگەن تۇجىرىمىن دا ايتا كەتتى:
- ەگەر جاقىن ءبىر ونجىلدىقتا ون ميلليوننان استام ادامنىڭ ءومىرىن قۇرتۋعا قابىلەتتى ءبىر نارسە پايدا بولسا، ول سوعىس ەمەس، اسا قاۋىپتى ۆيرۋس بولادى. زىمىران ەمەس، ميكروبتار ءومىرىمىزدى جالمايدى.
سول كەزدىڭ وزىندە قوعام قايراتكەرى ادامزاتتىڭ 2020 جىلى تاپ بولاتىن نەگىزگى پروبلەمالارىن سيپاتتاپ بەردى.
- بىرىنشىدەن، كەدەي ەلدەردە مىقتى دەنساۋلىق ساقتاۋ جۇيەسىن قۇرۋ قاجەت، ويتكەنى ولار ىندەتتەن باسقالارعا قاراعاندا كوپ زارداپ شەگەدى. سونداي-اق، كۇش-جىگەرى اسكەري كۇشتەرمەن بىرىكتىرىلگەن، قاۋىپ-قاتەرگە تەز جاۋاپ بەرە الاتىن مەديتسينالىق قىزمەتتەردىڭ رەزەرۆىن جاساقتاۋدى قولعا الۋ كەرەك. وسال جەرلەردى انىقتاۋ ءۇشىن باكتەريولوگيالىق جاتتىعۋلار جۇرگىزۋ قاجەت. سونىمەن قاتار، ۆاكتسيناتسيا جانە دياگنوستيكا سالاسىندا جەتىلدىرىلگەن زەرتتەۋلەردى جاساعانىمىز ابزال.
ءسوز سوڭىندا الەمگە تانىمال ميللياردەر حالىقتى بوسقا ءدۇرلىكپەي, ارەكەت ەتۋگە شاقىردى.
ديانا اسانوۆا،
«ادىرنا» ۇلتتىق پورتالى
