بۇگىن اقپاراتتىق-كوممۋنيكاتسيالىق ورتالىعىندا قازاقستان مۇسىلماندارى ءدىني باسقارماسىنىڭ شىمكەنت قالاسى بويىنشا باس يمامى باقداۋلەت ءابدىراحمانوۆ پەن نايب يمامى داستان جەلەۋوۆ قالامىزدا ەنگىزىلگەن شەكتەۋلەرگە بايلانىستى قاسيەتتى قۇربان ايت مەيرامىنىڭ قاشىقتىقتان وتكەن قورىتىندىسى بويىنشا بريفينگ بەردى.
– بيىل ەلىمىزدەگى ەپيدەميولوگيالىق احۋالعا بايلانىستى قاسيەتتى قۇربان ايت مەرەكەسىندەگى قۇرباندىق شالۋ ونلاين تۇردە جۇرگىزىلدى. ياعني، قالامىزداعى نيەت ەتكەن ازاماتتار «Qurban2020.kz» سايتى ارقىلى ونلاين تاپسىرىس بەرىپ، امالدارىن ورىندادى. ونلاين تاپسىرىس بەرگەندەر تاراپىنان 39 ءىرى قارا مال، 396 ۇساق مال، ال تۇرعىندار تاراپىنان 18 ءىرى قارا مال، 292 ۇساق مال قۇرباندىققا شالىندى. بۇل قۇرباندىققا شالىنعان مالدىڭ ەتتەرى 5650 وتباسىعا تاراتىلدى. ول وتباسىلار – كوپ بالالى، مۇمكىندىگى شەكتەۋلى جانە ۋاقىتشا تابىسىنان ايىرىلعان وتباسىلار. وسى رەتتە ايتا كەتەيىن، قاسيەتتى مەرەكەدە قۇرباندىققا شالىنعان مالدىڭ ەتتەرى مۇقتاج وتباسىلارعا دەر كەزىندە تاراتىلۋى مەن ىسىراپشىلدىققا جول بەرمەۋ ماقساتىندا ارنايى توپ قۇرىلۋىنا قالا اكىمى مۇرات دۇيسەنبەكۇلىنىڭ كومەگى وراسان بولدى، – دەدى ب.نۇرماتۇلى.
باس يمامنىڭ سوزىنە سۇيەنسەك، قالادا بيىل قۇرباندىق شالۋ شاراسى ونلاين تۇرىندە العاش وتكەنىمەن، ناتيجەسى بىلتىرعى جىلدان جوعارى. دەگەنمەن كەي قاتەلىكتەر كەتكەنىن جوققا شىعارمادى. ياعني ءوتىنىش بەرۋ بارىسىندا كورشى وڭىرلەردەن دە وتىنىشتەر ءتۇسىپ، ول 3800-گە جۋىقتاسا، ال قايتالانعان وتىنىشتەر 1 مىڭنان اسىپتى. بۇل رەتتە قالامىزدا مەشىتكە تىركەلۋ ارقىلى ءوتىنىش بەرگەن 2000 مىڭنان استام مۇقتاج وتباسىعا ەت تاراتىلعانىن ايتا كەتكەن ءجون.
سونداي-اق، داستان سۇلەيۇلىنىڭ سوزىنشە، ەلىمىزدە وسىنداي قيىندىق جاعداي تۋىنداعان كەزدە بۇل قۇرباندىق شالۋدىڭ ونلاين جۇيەسى ىندەتتىڭ كەڭ تارالۋىنا توسقاۋىل بولدى. ال قۇرباندىق شالعان كىسىلەر ءۇشىن وكىلدىكتى، ياعني اماناتتى مويىندارىنا الىپ، كۇمانداردى سەيىلتۋ ءۇشىن تاپسىرىس بەرگەن ازاماتتارعا ۆيدەو ەسەپ بەرگەندەرىن العا تارتتى.
شىمكەنت اقپاراتتىق-كوممۋنيكاتسيالىق ورتالىعى
فوتو – س.قوساي
