الىپپەنى كىمدەر جازىپ جاتىر؟

3280
Adyrna.kz Telegram
وقۋلىق جازۋ سوتسياليستىك جارىس پا?
ەل ماقتاعان باس مۇعالىم نەگىزگى تۇيتكىلگە نۇكتە قويدى. بۇرىنعى باسشى تامىرىنا بالتا شاۋىپ,كۇرەسىنگە تاستاعان "الىپپە" مەن "انا ءتىلىن" قايتاردى. ەل ىقىلاسىنا بولەنىپ تۇرعان مينيستر اسحات ايماعامبەتوۆ قوعامدىق پىكىرگە ناقتى باعاسىن وسىلاي بەردى.
"الىپپە" مەن "انا ءتىلى" قايتتى دەپ" بوركىمىزدى اسپانعا اتىپ قۋانىپ جاتىرمىز. دۇرىس-اق. ماسەلە سونىمەن ءبىتتى مە?بىر ايدان سوڭ جاڭا وقۋ جىلى باستالادى. ال ەندى سول "الىپپە" مەن "انا ءتىلى" قالاي جازىلىپ جاتىر?كىمدەر جازىپ جاتىر?تاپسىرىس بەرۋشى كىم?ساراپتان وتكىزەتىن القا قۇرامى قالاي?بيىلعى جىلى جەدەل ازىرلەنگەن ەكى-ءۇش وقۋلىق تاجىريبە رەتىندە ءبىر جىل وقىتىلاتىن كورىنەدى,سوسىن كەلەر جىلى ناقتى شەشىمگە كەلەتىن سياقتى.
بىلۋىمشە ءدال وسى كۇندەرى "قوس وكپەسىن قولعا الىپ" 12-13 باسپا جارىسا,جانتالاسا وقۋلىق جازىپ جاتقان كورىنەدى. ەرتەڭ "بابى" مەن "باعى" كەلىسىپ,ماڭدايى جارقىراعان ءبىر-ەكى باسپانىڭ توپتاپ قوسقان توبى بايگەدەن كەلەدى. بۇل نە?سوتسياليستىك جارىس پا?وزىق وقۋلىقتى ءبىلىم مينيسترلىگىنىڭ جانىنداعى ارنايى قۇرىلعان ساراپتامالىق كوميسسيا قاراپ,تيىستى شەشىم قابىلدايتىن كورىنەدى. ول كوميسسيا قالاي قۇرىلدى?قانداي مامانداردان قۇرىلدى?بۇل كوميسسياعا باسپالاردىڭ "بارماق باستى,كوز قىستى" ىقپالى قالاي? ەڭ باستىسى - سول كوميسسياعا ەلىمىزدەگى ەڭ بىلىكتى ماماندار تارتىلدى ما?وسى كۇندەرى كۇندىز-ءتۇنى ۇيقى كورمەي (از عانا ۋاقىت قالدى عوي) وقۋلىق جازىپ جاتقان مامانداردىڭ ءوزى ول كوميسسيادا بار ما?بولسا,ەرتەڭ ول ءوز "باسپاسىنىڭ" جىرىن جىرلاپ كەتپەي مە?ساۋال وتە كوپ...
وقۋلىق جازۋ ءىسىن جەكەلەگەن باسپالار مونوپولياعا اينالدىرىپ العانى ەشكىمگە جاسىرىن ەمەس. زامانىندا وقۋلىقپەن ەكى باسپا - "مەكتەپ" پەن ء"بىلىم" عانا اينالىساتىن,بىراق ول كەزەڭدە تاپسىرىس بەرۋشى باسپانىڭ ءوزى مە,مينيسترلىك پە,ەسىمدە جوق. قازىرگى كۇنى وقۋلىق جازۋ ءىسى تولىقتاي باسپالاردىڭ قۇزىرىنا وتكەن,بار گاپ وسىندا... تاپسىرىس بەرۋشى دە باسپانىڭ ءوزى. وقۋلىق جازاتىن مامانداردى دا جاساقتايتىن باسپا. بۇل قانشالىقتى دۇرىس?مۇنى زەرتتەگەن جان بار ما?ساۋال كوپ... ءبىلىم ءمينيسترى وسى باعىتتا تەرەڭ,وت-تە تەرەڭ ويلانۋى كەرەك.
سوسىن,ەلىمىزدەگى ۇلتتىق مەكتەپتەرگە دە جەكەلەگەن باسپا وقۋلىق جازاتىن كورىنەدى. ماسەلەن,وزبەك جانە ۇيعىر تىلىندەگى مەكتەپتەرگە وقۋلىقتى "جازۋشى" باسپاسى جازادى ەكەن. ەلىمىزگە ءمالىم باسپا. ولار دا مامانداردى سول ۇلتتىڭ وكىلدەرىنەن وزدەرى تاڭداپ الاتىن كورىنەدى. ولار وقۋلىقتى قالاي جازىپ جاتىر?يدەولوگياسى قالاي?مەكتەپ تابالدىرىعىن جاڭا اتتاعان بالا قاي ۇلتتىڭ قۇندىلىقتارىمەن قارۋلانىپ جاتىر?ەرتەڭ ولار قازاق مەملەكەتىنىڭ پاتريوتى بولا ما?بۇل باعىتتا دا ويلاناتىن ماسەلە جەتەرلىك.
مامانداردىڭ ايتۋىنشا,كەڭەس ۋاقىتىندا (ول ءداۋىردى ساعىنىپ وتىرعان جايىم جوق,بىراق سول ءداۋىردىڭ ءبىلىم بەرۋ سالاسى ناقتى جۇيەگە قۇرىلعانىن مويىنداۋ كەرەك) وقۋلىق جازۋعا تاپسىرىستى ءبىلىم مينسترلىگى بەرەتىن. ساراپتاۋ كوميسسياسى دا ەلىمىزدەگى ەڭ بىلىكتى,تاجىريبەلى مامانداردان قۇرىلعان. بارلىق جاۋاپكەرشىلىك ءبىر عانا تاراپتا. بىزگە جەتكەن اقپارات بويىنشا,مينيسترلىكتىڭ جانىنان قۇرىلعان ساراپتامالىق كوميسسيانى مۇقيات قاراۋ كەرەك. كوميسسيا مۇشەلەرىنىڭ ارقايسىنا باسپالاردىڭ ىقپال-اسەرى دەگەندى پىشاق كەستى تيۋ كەرەك!قۇرامدى ادىلەتتى,مايلى جىلىكتى ۇستاپ وتىرعان باسپا جەتەگىندە جۇرمەيتىن بىلىكتى مامانداردان قۇرۋ كەرەك. "بارماق باستى,كوز قىستىلىق" ءدال وسى ءبىلىم سالاسىنان تۇبىرىمەن جويۋ قاجەت. بۇل - ءبىزدىڭ ۇرپاقتىڭ تاعدىرى!بىلىمدى ۇرپاق - مەملەكەتتىڭ تىرەگى!
ۇسىنىس!وقۋلىق جازۋعا تاپسىرىستى ءبىلىم مينيسترلىگى ءوزى بەرۋى كەرەك!ەلىمىزدەگى وقۋلىق جازاتىن ەڭ بىلىكتى مامانداردى وزدەرى جاساقتاۋى قاجەت. باسپالار تەك دايىندالعان ءونىمدى شىعارىپ بەرۋشى عانا بولۋ ءتيىس!
وسى ماسەلەگە ءبىلىم جانە عىلىم ءمينيسترى اسحات ايماعامبەتوۆ مىرزا ءجىتى نازار اۋدارادى دەپ سەنەمىن!
قۇرمەتپەن,
جاناربەك ءاشىمجان,
"انا ءتىلى" گازەتىنىڭ باس رەداكتورى,
پرەزيدەنت سىيلىعىنىڭ لاۋرەاتى,
قازاقستاننىڭ ەڭبەك سىڭىرگەن قايراتكەرى.
پىكىرلەر