بۇل جونىندە شىمكەنت قالاسىنىڭ اكىمى مۇرات ايتەنوۆ دەمالىس كۇنى توتەنشە جاعدايلاردى بولدىرماۋ جانە الدىن الۋ ماقساتىندا، بادام وزەن ارناسىن بۇرۋ جانە بۇزىلعان جولدى قايتا قالپىنا كەلتىرۋ بويىنشا اتقارىلاتىن جۇمىستاردىڭ بارىسىمەن تانىسۋ كەزىندە ايتتى.
اكىم اباي اۋدانىنا قاراستى جاڭاتالاپ اۋىلى تۇرعىندارىنىڭ زاڭسىز قۇم قازۋ كەسىرىنەن بادام جاعاسىن سۋ شايىپ كەتۋ قاۋپى بار دەگەن شاعىمدارىن نازارعا الىپ، زاڭسىز جەر قويناۋىن پادالانۋشىلاردىڭ ماسەلەسىن جەكە باقىلاۋىنا الدى.
مۇرات ايتەنوۆ جەر قويناۋىن پايدالانۋ سالاسىنداعى قۇجاتتاردى جان-جاقتى قايتا قاراپ، تياناقتى ساراپتاۋدى تاپسىردى. سونىمەن قاتار، زاڭسىز جەر قويناۋىن يگەرىپ جاتقان ۇيىمدارعا قاتىستى بىرقاتار جاڭا مىندەتتەر جۇكتەدى.
كوكتەم جانە كۇز ايلارىندا جاۋىن شاشىن سالدارىنان جانە تۇركىستان وبلىسىنىڭ تۇلكىباس، تولەبي اۋداندارىنىڭ تاۋلارى مەن بۇلاق كوزدەرىنەن باستاۋ الىپ، قالا اۋماعىنان وتەتىن جانە اعىسى قاتتى بادام وزەنىنىڭ سۋ دەڭگەيى كوتەرىلىپ، جاعالاۋىنا جاقىن ورنالاسقان تۇرعىن ۇيلەر مەن ەگىستىك جەرلەرگە قاۋىپ تۋىپ وتىرعاندىعى بايقالادى.
قازىرگى كەزدە اباي اۋدانى اۋماعى بويىنشا جاعالاۋلارىن بەكىتۋ جانە وزەن ارناسىن بۇرۋدى قاجەت ەتەتىن 3300 مەتر جەر انىقتالىپ، جالپى قۇنى 427,5 ملن.تەڭگەنى قۇرايتىن سمەتالىق ەسەپتەمەلەر ازىرلەنىپ وتىر.
ايتا كەتەيىك، اباي اۋدانى اۋماعى ارقىلى اعىپ وتەتىن بادام وزەنى بويىندا قىزىلجار، يگىلىك، جاڭاتالاپ، تاۋەلسىزدىككە 20 جىل، كوكبۇلاق تۇرعىن الابتارى ورنالاسقان.
شىمكەنت
