پەدوفيلدەردى ءولىم جازاسىنا كەسۋدى قولدايسىز با؟

قازىرگى تاڭدا پەدوفيليزم تاقىرىبى كۇن تارتىبىندەگى وزەكتى ماسەلەگە اينالىپ تۇر. الىسقا بارماي-اق كەشەگى ساتپاەۆ قالاسىنداعى وقيعا بۇل دەرتتىڭ ءبىزدىڭ قوعامنىڭ قانداي جەرگە دەيىن جەتكەنىن كورسەتىپ بەردى. وسىعان بايلانىستى "ادىرنا" ۇلتتىق پورتالى "پەدوفيلدەردى ءولىم جازاسىنا كەسۋدى قولدايسىز با؟" دەگەن تاقىرىپتا ساۋالناما جۇرگىزدى.

دۋلات يسابەكوۆ، جازۋشى:

قوس قولىمدى كوتەرىپ قولدايمىن. ونداي حايۋانداردى ءبىز نەگە حالىقتىڭ اقشاسىنا اسىراۋىمىز كەرەك؟ دەموكراتيالىق ەلمىز دەپ ءولىم جازاسىن الىپ تاستاپ، الەمگە دەموكرات بولىپ كورىنبەي-اق قويايىق. دەموكراتيانىڭ ورداسى سانالاتىن امەريكادا ءولىم جازاسى بار. ال، بۇنداي ەكى اياقتى حايۋاندارعا قوعامنان ورىن جوق!

ابزال قۇسپان، زاڭگەر:

قانداي دا ءبىر ءولىم جازاسىنا قارسىمىن. قارسى بولىپ وتىرعانىم پەدوفيلدەرگە جانىم اشىپ وتىرعاننان ەمەس. زاڭگەرلەر ونداي كاتەگوريامەن ويلامايمىز. بىزدەر قانشالىقتى ءتيىمدى، ءتيىمسىز دەگەن تۇرعىدان كەلەمىز. بۇل زاڭ پەدوفيليانى توقتاتا ما جوق پا دەگەن. ءولىم جازاسىن ەنگىزۋ ارقىلى پەدوفيليانى توقتاتۋ بۇل مۇمكىن ەمەس نارسە. پەدوفيلدەر پسيحيكالىق تۇرعىدان ەمدەۋدى قاجەت ەتەدى. ەكىنشىدەن، بۇلارعا حيميالىق كاستراتسيا قولدانۋ كەرەك. بولدى. دامىعان ەۋروپاداعى كوپتەگەن مەملەكەتتەر حيميالىق كاستراتسيانى قولداناتىنىن دا ەسكەرۋ كەرەك. ونى قولدانعان جاعدايدا دا مەنىڭ ۇسىنىسىم، بۇرىندا سسسر كەزىندە اتۋ جازاسى ۇكىم شىققاننان كەيىن ءبىر جىلدان كەيىن ورىندالاتىن. سول كەزدە سسسر-دە ۇشتىك دەگەن بولاتىن، دەرەۋ ۇكىم شىعارىپ، اتىپ تاستايتىن حالىق جاۋلارىن. ۋاقىت وتە كەلە سول حالىق جاۋلارى دەگەنىمىز ۇلتتىڭ بەتكە ۇستار قايماقتارى بولىپ شىقتى. ءبارى اقتالدى قازىر. كەيىن سول قاتەلىكتەن ساباق الىپ، ۇكىم شىققاننان كەيىن ءبىر جىلدان سوڭ ورىندالاتىن بولدى. ونداعى سەبەپ سوت قاتەلىگى دەگەن بولادى. ادامي فاكتور ارينە قاتەلەسۋى مۇمكىن. بۇنداي قاتەلىك امەريكادا دا ورىن الىپ جاتادى. سول سياقتى حيميالىق كاستراتسيانى دا ۇكىم شىققاننان كەيىن ءبىر جىلدان كەيىن ورىنداۋ كەرەك دەپ ويلايمىن. تۇرمەدە 10-15 جىل وتىرىپ شىققاننان كەيىن، حيميالىق كاستراتسيادان كەيىن قورشاعان ورتاعا، قوعامعا، بالا-شاعاعا ەشقانداي قاۋىپتى بولمايدى. ايتپەسە، ونى قازىر اتىپ تاستاعاننان بۇنداي قىلمىس ساپ تيىلمايدى. گۋمانيزم دەگەندى دە ەستەن شىعارماۋىمىز كەرەك. پسيحيكالىق اۋرۋلاردى ەمدەگەن سياقتى بۇنداي ادامدار دا ەمدەۋگە ءزارۋ ادامدار. قازىرگى ەلدىڭ شۋلاپ جاتقانى بۇل جاي عانا ەموتسيا عوي. ەكى كۇن شۋلايدى، ءۇش كۇن شۋلايدى، باسىلادى. بۇل قازاقتىڭ باسىنداعى عانا ەلدەن ەرەك قىلمىس ەمەس، الەمدە كورىنىس تاۋىپ جاتقان قىلمىس. جەر جارالعالى قىلمىس دەگەن نارسە ورىن الىپ كەلە جاتقانىن ادامدار ۇمىتىپ كەتەدى. ادام اتا مەن حاۋا انانىڭ ۇلى ابىل مەن قىبىل ءبىرىن-ءبىرى ءولتىرىپ ەڭ العاش ادام ءولتىرۋ دەگەن قىلمىس سول كەزدەن بولعان. قىلمىستى جويىپ جىبەرە المايسىڭ. قىلمىستى مينيمۋمعا ازايتۋعا بولادى.

ءجۇرسىن ەرمان، اقىن:

ەڭ قاتال جازاعا لايىق. زاڭ جۇمساق. ءبىزدىڭ ەلدە جوققا ءتان وسىنداي پالەنى قۇرتۋ ءۇشىن ءولىم جازاسىن ەنگىزسە بولار ەدى.