شىمكەنت اقپاراتتىق-كوممۋنيكاتسيالىق ورتالىعىندا قازاقستان مۇسىلماندارى ءدىني باسقارماسىنىڭ شىمكەنت قالاسى بويىنشا باس يمامى باقداۋلەت ابدراحمانوۆتىڭ قاتىسۋىمەن ءباسپاسوز بريفينگى ءوتتى.
بيىل قاسيەتتى قۇربان ايت مەرەكەسى 31 شىلدە مەن 1-2 تامىز كۇندەرىنە سايكەس كەلىپ تۇر. قۇربان شالۋ جاعدايى بار ءار مۇسىلمانعا ءۋاجىپ امال.
- ەلدەگى ەنگىزىلگەن كارانتين جاعدايىنا بايلانىستى قۇربان ايت نامازى وقىلمايدى، قاساپحانالاردا مال سويىلمايدى. بىراق، قۇربان شالۋعا نيەتتى ازاماتتار قاشىقتان قۇربان شالا الادى. ول ءۇشىن ازاماتتار QURBAN2020.MUFTYAT.KZ سايتىنا 30 شىلدەگە دەيىن قۇرباندىق شالۋعا ونلاين تاپسىرىس بەرە الادى. الايدا جەرگىلىكتى اكىمشىلىك پەن سانيتارلىق ەپيدەميولوگتاردىڭ رۇقساتىمەن عانا جۇزەگە اسىرىلادى. كارانتين تالاپتارىنىڭ قاتاڭ تۇردە ساقتالۋى قاداعالانادى، - دەدى باس يمام.
ايتا كەتەرلىگى قۇربان شالعان ازاماتتار قۇربان ەتىن ۇشكە ءبولىپ، ءبىر بولىگىن اعايىن-تۋىس، كورشى-قولاڭعا ارناپ ايتتىق داستارحان جاياتىن.
ال قاشىقتان قۇرباندىق شالىنعان كەزدە ەتتىڭ ۇشتەن ءبىرى شالعان ادامعا بەرىلمەي، تۇگەلدەي الەۋمەتتىك از قامتىلعان جاندارعا، مۇقتاج وتباسىلارعا ۇلەستىرىلەتىن بولادى.
قازاقستان مۇسىلماندارى ءدىني باسقارماسى قۇربان ايت مەرەكەسىنە وراي Qurban2020.kz سايتىن ىسكە قوستى.
بۇعان دەيىن ەلىمىزدەگى ەپيدەميولوگيالىق احۋالعا بايلانىستى قۇربان شالۋعا ونلاين تۇردە تاپسىرىس بەرەتىن سايتتىڭ اشىلاتىنى تۋرالى حابارلانعان بولاتىن.
قازاق جانە ورىس تىلدەرىندە قىزمەت كورسەتەتىن جاڭا سايتتىڭ كومەگىمەن ەل تۇرعىندارى ونلاين تۇردە قۇرباندىق مالىن تاڭداپ، تولەم جاساپ، كەيىن قالاسا فوتو جانە بەينە ەسەبىن سۇراتا الادى.
سونداي-اق سايتتا قۇربان شالۋعا قاتىستى شاريعات جانە ءپاتۋا ءبولىمى ماماندارى دايىنداعان سۇراق-جاۋاپ تا بار.
شىمكەنت
