شىمكەنتتە پارامەن ۇستالعان شەنەۋنىكتەر ايىپپۇل ارقالاپ، جازادان قۇتىلعانى تۋرالى ايتىلدى، دەپ حابارلايدى "ادىرنا" ءتىلشىسى.
شىمكەنتتىڭ كەلبەتىنە جاۋاپتى قالالىق ساۋلەت، قۇرىلىس جانە جەر قاتىناستارى باسقارماسى باسشىسىنىڭ ورىنباسارى مەن ءبولىم باستىعى سىبايلاس جەمقورلىق جاسادى دەپ ايىپتالعان بولاتىن. الايدا سوت ولاردى باس بوستاندىعىنان ايىرمادى، ميلليونداعان ايىپپۇل سالدى.
ءۇشىنشى مەگاپوليستە سىبايلاس جەمقورلىققا قارسى ءىس مامىر ايىندا باستالعان. تەرگەۋ بارىسىندا جەر ۋچاسكەسىن مەملەكەتتىك الىپ قويۋ كەزىندە بيۋدجەت قاراجاتىن كەدەرگىسىز تولەم ءۇشىن باسقارما باسشىسىنىڭ ورىنباسارى مەن ءبولىم باستىعىنىڭ الدىن الا ءسوز بايلاسۋ بويىنشا كاسىپكەردەن بەس ميلليون تەڭگە كولەمىندە پارا العانى ايتىلعان ەدى. الايدا ەكس-شەنەۋنىكتەردىڭ اتى-ءجونى اتالمادى. تەك زاڭعا قايشى ارەكەتتەرى ءۇشىن ولارعا ميلليونداعان ايىپپۇل سالىنعانى بەلگىلى. وسىلايشا ولار تەمىر توردان امان قالعان.
سوت ۇكىمىمەن ولار جاۋاپتى قىزمەتتەرىنەن بوساتىلدى. بۇل تۋرالى قالالىق سىبايلاس جەمقورلىققا قارسى ءىس-قيمىل اگەنتتىگى ءبىرىنشى ورىنباسارى حابارلادى.
"شىمكەنت قالاسىنىڭ ساۋلەت باسقارماسىنا قاتىستى باسشىنىڭ ورىنباسارى مەن باستىعىنا قاتىستى قىلمىستىق ءىس سوتقا جولداندى. ساۋلەت باسقارماسى باسشىسىنىڭ ورىنباسارى 50 ملن تەڭگە ايىپپۇل، ءبولىم باسشىسىنا 58 ملن تەڭگە ايىپپۇل سالىندى", – دەدى شىمكەنت قالاسىنىڭ سىبايلاس جەمقورلىققا قارسى ءىس-قيمىل اگەنتتىگى باسشىسىنىڭ ورىنباسارى رۇستەم تاناباەۆ.
ۇقساس جاڭالىقتار
