تاشكەنتتە 74 ەمحانا تاۋلىك بويى جۇمىس ىستەيدى

مەديتسينا قىزمەتكەرلەرى بولسا 12 ساعاتتىڭ جۇمىس كەستەسىنە كوشتى. بۇل تۋرالى Centrasia.org  كوروناۆيرۋسپەن كۇرەس جونىندەگى شۇعىل شتاب وكىلى بارنو اديلوۆاعا سىلتەمە جاساپ  حابارلادى. 

بارنو اديلوۆانىڭ ايتۋىنشا، ءاربىر ەمحانانىڭ جۇمىس ءتارتىبى انىقتالعان. دارىگەرلەر ءۇيدى-ۇيگە حابارلاسىپ، اقپارات جينايدى. ناۋقاستاردى انىقتاپ، ولارعا كومەك كورسەتۋ جولدارىن تاڭدايدى. ماسەلەنى تەز ارادا شەشۋ جولدارىن قاراستىرادى.

وسى جۇمىستاردى اتقارۋ ءۇشىن ەمحانالارعا 750 ۇيالى تەلەفون جەتكىزىلدى، ءاربىر وتباسىلىق ەمحانادا كولل-ورتالىقتار ۇيىمداستىرىلدى. ولار تاۋلىك بويى قىزمەت كورسەتەدى.

حابارلارعا قاراعاندا، ءاربىر ەمحانادا شۇعىل بريگادالار قۇرىلدى. ۇيدە ەمدەلەتىن ناۋقاستارعا ءدارىنى سولار جەتكىزەدى.

ايتا كەتەيىك، وزبەكستاندا 18 531 ادامنان كوروناۆيرۋس تابىلدى. ولاردىڭ 207-ءسى كەشە انىقتالعان. 99 ادام قايتىس بولعان. 9 872 ادام كوروناۆيرۋستان جازىلعان. قازىرگى كەزدە 8 560 ادام اۋرۋحانادا جاتىر.

ال قازاقستاندا كوروناۆيرۋس جۇقتىرعاندار سانى 76 799 امعا جەتتى. ولاردىڭ 48 220-سى جازىلىپ شىقسا، 585 ادام قايتىس بولدى.

وزبەكستاندا 31 ملن-نان استام حالىق تۇرسا، قازاقستان حالقى 18 ملن-نان اسادى.

"ادىرنا" ۇلتتىق پورتالى