تۇرمىستىق ومىردە ءتۇرلى كەلەڭسىزدىكتەرگە كەزىگىپ جاتامىز. ال ءسىز سول كەلەڭسىزدىكتەردى تەز شەشۋدىڭ جولدارىن بىلەسىز بە؟ بىلمەسەڭىز، بۇل ماقالا سىزگە ارنالادى. «ادىرنا» ۇلتتىق پورتالى تۇرمىستىق ومىردە اسا قاجەت بولاتىن لايفحاكتاردى نازارلارىڭىزعا ۇسىنادى.
كۇيىپ قالعان تابانى تازالايمىز
كۇيىپ قالعان تابانى كوپ كۇش جۇمساماي تازارتۋعا بولادى. ول ءۇشىن تاباعا كىشكەنە سۋ قۇيىپ، 1 ستاقان سىركە سۋىن قوسۋ كەرەك. سودان كەيىن تابانى پەشتە بىرنەشە مينۋت قىزدىرىڭىز. كەيىن 2 اس قاسىق اس سوداسىن قوسىڭىز. ناتيجەسىندە كۇيگەن تاماق قالدىقتارىن وڭاي جويۋعا بولادى.
كىلەمدەگى داق
ەشقانداي جاعدايدا داقتى دىمقىل شۇبەرەكپەن جانە سابىنمەن سۇرتپەۋ كەرەك. وعان ازداپ سىركە سۋىن قۇيىپ، ءبىر شىمشىم اس سوداسىن سەبىڭىز. سودان كەيىن پايدا بولاتىن كوپىرشىكتى قوسپا داقتى كەتىرەدى. كوپىرشىكتى ماقتامەن ءسۇرتىپ تاستاڭىز.
شاڭ
كادىمگى شۇبەرەك شاڭنان ارىلۋعا كومەكتەسەدى، بىراق بۇل ۋاقىتشا عانا. جيھازدى شاڭنان ۇزاق ۋاقىت قورعاۋ ءۇشىن انتيستاتيكالىق شۇبەرەك مايلىقتارىن قولدانۋ كەرەك.
اينا
اينانى تازارتۋ ءۇشىن قاعاز سۇلگىلەردى پايدالانۋدىڭ قاجەتى جوق. سەبەبى سۇرتكەننەن كەيىن قاعاز بولىكتەرى ايناعا جابىسىپ قالادى. ونىڭ ورنىنا گازەتپەن تازالاپ كورىڭىز. گازەتتەن ەشقانداي قالدىق قالمايدى ءارى جاقسى تازالايدى.
ۆاننا
ۆاننانى تازارتۋدىڭ قيىن ەكەندىگى بارلىعىنا ءمالىم. ەگەر ءسىز ونى تۇزعا جارتى ليمون نەمەسە گرەيپفرۋتتى قوسىپ ءسۇرتىپ شىقساڭىز، تەز تازالاي الاسىز.
كيىمدەگى بوياۋ
ەگەر ءسىز بايقاۋسىزدا كيىمىڭىزگە بوياۋ قۇيىپ الساڭىز، ونىڭ كەپكەنىن كۇتىڭىز. كەيىن ونى ۇستارانىڭ جۇزىمەن وڭاي الىپ تاستاۋعا بولادى. ارينە ماتانى كەسىپ الماۋعا تىرىسۋ كەرەك. مۇقيات بولىڭىز.
پەرنەتاقتا
پەرناتاقتا ۋاقىت وتە كەلە كىرلەيدى. الايدا ونى كوپ كۇش جۇمساماي-اق تازارتۋدىڭ جاقسى ءتاسىلى بار. الدىمەن ءسىز پەرنەتاقتانى ەسكى ءتىس ششەتكاسىمەن تازالاپ الىڭىز. سودان كەيىن شاڭ سورعىشتى پايدالانىپ، ودان بارلىق كىردى سورىپ الىڭىز.
بلەندەر
كوبىنەسە بلەندەردى قولمەن تازالاعان كەزدە قول جاراقاتتارى پايدا بولىپ جاتادى. جاراقاتتىڭ الدىن الىپ، وڭاي تازالاۋ ءۇشىن بلەندەرگە ازداپ ىستىق سۋ قۇيىڭىز. ودان سوڭ وعان سابىن قوسۋ كەرەك. كەيىننەن بلەندەردى ءبىر-ەكى مينۋتقا قوسىڭىز. ول ءوزىن-ءوزى تازارتادى.
گۋبكا
ىدىس-اياقتاردى جۋعاننان كەيىن، ادەتتە، گۋبكانى جاي سۋمەن جۋىپ، كەپتىرۋگە قالدىرادى. بىراق بۇل باكتەريالار مەن ميكروبتاردى ولتىرمەيدى. ميكروبتاردان قۇتىلۋ ءۇشىن ونى سۋعا مالىپ الىپ،ميكروتولقىندى پەشتە ەكى مينۋتتاي ۇستاۋ كەرەك.
ديانا اسانوۆا، «ادىرنا» ۇلتتىق پورتالى
