شىمكەنت قالاسىنىڭ اكىمى مۇرات ايتەنوۆ كوممۋنالدىق قىزمەتتەردىڭ جۇمىسىن قاتاڭ سىنعا الىپ، ءتيىستى باسشىلاردان بۇل سالادا ءتارتىپ ورناتۋدى تالاپ ەتتى.
شىمكەنت اۋماعىنا قوقىس كونتەينەرلەرىن ورناتۋ بويىنشا وتكەن جيىندا قالا باسشىسى تۇرعىندار تاراپىنان قوقىستى جيناۋ جۇمىستارىنا دەگەن نارازىلىعى كوپ ەكەنىن ايتتى.
«قالانى ارالاۋ بارىسىندا كوممۋنالدىق قىزمەتتەر جۇمىسىنىڭ وتە ناشار جۇرگىزىلەتىنىن كورىپ ءجۇرمىن. كوپتەگەن قوقىس الاڭشالارىنا سانيتارلىق تازالاۋ جۇمىستارى جۇيەلى تۇردە جۇرگىزىلمەيدى. ال ايالدامالار مەن كوشە بويىنداعى قوقىس جاشىكتەرى ۇنەمى تولىپ تۇرادى. بۇل اۋدان اكىمدىگى تاراپىنان باقىلاۋدىڭ جوق ەكەنىن اڭعارتادى»،-دەدى قالا اكىمى.
مۇرات ايتەنوۆ اۋدان اكىمدەرى مەن ەنەرگەتيكا جانە كوممۋنالدىق شارۋاشىلىق باسقارماسى باسشىسىنىڭ مىندەتىن اتقارۋشى ن.جامانكوزگە قوقىس جاشىكتەرىن ورناتۋ جۇمىستارى كەشەۋىلدەپ جاتقاندىعى تۋرالى ەسكەرتۋ بەرىپ، بوس سوزدەن ناقتى ىسكە كوشۋدى تاپسىردى. سونىمەن قاتار، ول جەكە سەكتور اۋماعىندا ارنايى قوقىس الاڭشاسىن ورناتۋ تۋرالى تاپسىرماسىنىڭ ءتيىستى دەڭگەيدە ورىندالماعانىن دا اتاپ ءوتتى.
جيىندى قورىتىندىلاعان قالا باسشىسى الداعى ۋاقىتتا ايتىلعان سىننان قانداي قورىتىندى شىعارىلاتىنىن تىكەلەي ءوزى باقىلايتىنىن ەسكەرتتى.
ايتا كەتەيىك، جالپى شىمكەنت قالاسىندا 488 قوقىس الاڭشاسىندا 2039 قوقىس كونتەينەرى بار. ونىڭ 633 داناسى جارامسىز بولسا، كوپ قاباتتى تۇرعىن ۇيلەردىڭ اۋماعىنا 762 كونتەينەردى قوسىمشا ورناتۋ كەرەك. اعىمداعى جىلى ساتىلىپ الىناتىن 1474 ەكو كونتەينەردى جارامسىزدارىن الماستىرۋ جانە جەتىسپەيتىن جەرلەرگە قوسىمشا ورناتۋ قاجەتتىگى جوسپارلاندى.
شىمكەنت
